Ouvir RAFA Ritmo, Voz e Coração de Timor
Governu Timor-Leste lori fila Timor-oan na'in-13 ne'ebé sai vitíma ba krime burla no tráfiku umanu, Tersa 20 Outubru 2026.
Díli, 20 Outubru 2026 (RAFA)— Governu Timor-Leste liu husi Polísia Sientífika Investigasaun Kriminál (PCIC) ho Servisu Nasionál Intelijénsia Estratéjiku (SNIE), Tersa-ne’e, lori fila vítima na’in-13 ba kazu burla ho tráfiku umanu.
Observasaun RAFA iha Aeroportu Internasionál Prezidente Nicolau Lobato, nota vítima sira to’o iha Timor-Leste ho aviaun Aero Dili, hale’u tuku 13:30 Otl no akompaña direta husi Diretór Nasionál PCIC Vicente Fernandes e Brito ho Diretór Jerál SNIE, Longuinhos Monteiro.
Tuir informasaun husi autoridade seguransa ne’ebé akompaña kazu ne’e, katak Timor-oan na’in-13 ne’e alegadamente sai vítima ba kazu burla ho poténsia ba tráfiku umanu.
Sira sai husi teritóriu Timor-Leste iha loron 17 fulan-Setembru tinan 2026 ho intensaun atu ba servisu iha Portugál. Maibé, to’o iha Bali- Indonézia, ajénsia ne’ebé trata sira abandona sira hodi husik hela sira hela mesak iha Bali.
Governu Timor-Leste orienta ba autoridade seguransa sira lori fila Timor-oan na’in-13 mai Timor-Leste hodi kontinua rekolla informasaun ba prosesu tuir mai.
Antes ne’e, autoridade seguransa simu uluk ona keixa husi vítima sira iha rai-laran, hafoin rona katak vítima iha rai-li’ur mós barak, durante ne’e abandona de’it iha Indonézia.
Autoridade seguransa haktuir, Timor-oan sira ne’e maioria joven, kontenti tanba bele ajuda sira lori fila mai Timor-Leste. Tanba durante besik fulan ida iha Indonézia, otél na’in la autoriza fila mai Timor-Leste, tanba seidauk selu otél, nune’e tenke selu mak foin sai. Tanba ne´e, Governu Timor-Leste uza nia autoridade hodi halo jestaun administrativa salva sidadaun Timor-oan sira-ne’e.
Autoridade seguransa liu husi ekipa konjunta PCIC no SNIE tuir orientasaun Governu simu Timor-oan iha Aeroportu Internasionál Prezidente Nicolau Lobato kontinua lori vítima sira ba otél balun iha Díli laran hodi kontinua prosesu tuir Lei ne’ebé vigora.
Jornalista: Juvinal Cabral
Written by: RafaFM
PCIC ho SNIE Lori Fila Timor-Oan Na'in-13 Vítima Kazu Burla no Tráfiku Umanu
todayNovember 20, 2026 10 2
Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.
Copyright Rafa.tl - Desenvolvido por Justweb.pt