Ouvir RAFA Ritmo, Voz e Coração de Timor
Komandante Komandu Fronteira Marítima Austrália, Kontra-Almirante Brett Stoner hasoru malu ho PM Xanana Gusmão iha Palásiu Governu, Tersa 20 Outubru 2026.
Díli, 20 Outubru 2026 (RAFA)— Governu Austrália kontínua hametin kooperasaun seguransa marítima ho Timor-Leste hodi kombate krime marítima sivíl sira, liga ho peska ilegál ne’ebé Estadu rua ne’e enfrenta, inklui ameasa krime transnasionál sira ne’ebé bele afeta siberseguransa entre nasaun rua.
Komandante Komandu Fronteira Marítima Austrália, Kontra-Almirante Brett Stoner, Tersa-ne’e, iha Palásiu Governu, hasoru malu ho Primeiru-Ministru Xanana Gusmão, hodi kontinua hametin kooperasaun ne’ebé Timor-Leste ho Autrália estabele ona iha tinan-sira antes.
Kontra-Almirante Brett Stoner informa katak, Timor-Leste mak parseiru ne’ebé forte ho Austrália atu esforsu hamutuk hodi kombate ameasa bá seguransa marítima.
“Onra boot ida, no priviléjiu ida bele fila-fali mai iha Timor-Leste. Timor-Leste hanesan parseiru forte ida husi Austrália hodi kombate ameasa seguransa marítima sivíl, agradese bá Primeiru-Ministru ne’ebé fó ona nia tempu hodi hasoru malu ho ha’u, ami ko’alia kona-bá saída mak Timor-Leste ho Autrália iha ona, ami nia parseria dezde 2025, nune’e mós área sira ne’ebé ita sei koopera iha futuru nu’udar parseiru kona-bá ameasa bá seguransa,” hatete Kontra-Almirante Brett Stoner.
Kontra-Almirante ne´e hatutan, importante husi enkontru ne’e mak kompromisu hamutuk atu kontinua hametin parseria entre nasaun rua, ne’ebé hanesan nasaun marítima no fahe interese komún iha seguransa marítima.
Kooperasaun ne’e la’ós foka de’it bá seguransa marítima, maibé mós inklui jestaun Migrasaun, kontrolu fronteira rai-maran, aeroportu no migrasaun, inklui ameasa transnasionál sira ne’ebé bele afeta siberseguransa entre nasaun rua.
Kontra-Almirante Brett Stoner subliña, peska ilegál sai preokupasaun importante ba Austrália no Timor-Leste, tanba atividade ne’e bele ameasa soberania, fronteira marítima no interese ekonómiku nasaun rua.
Austrália no Timor-Leste kompromete atu kontinua servisu hamutuk hodi kombate peska ilegál no ameasa transnasionál sira, liu-husi kooperasaun no parseria ne’ebé forte, atu asegura estabilidade no seguransa iha tasi.
Jornalista: Marcelino Tomae
Written by: RafaFM
Governu Austrália PM Xanana Gusmāo
todayNovember 20, 2026 12 2
Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.
Copyright Rafa.tl - Desenvolvido por Justweb.pt