Noticias

MAPPF Planeia Sosa Karau Husi Bali

todayOctober 20, 2026 70

Background
share close

Díli, 20 Outubru 2026 (RAFA) – Ministériu Agrikultura, Peska, Pekuária no Floresta (MAPPF) planeia utiliza Orsamentu Jerál do Estadu (OJE)  2027  sosa karau husi Bali-Indonézia  ho objetivu habokur no dezenvolve setór pekuária iha Timor-Leste.

Ministru Agrikultura, Peska, Pekuária no Floresta, Marcos da Cruz, Segunda-ne’e iha Parlamentu Nasionál, haktuir ba jornalista sira, MAPPF forma ona ekipa ida ne’ebé lidera husi Sekretáriu Estadu Pekuária sei bá Bali, iha loron 21 fulan-Novembru-ne’e atu halo diskusaun ho Governu Provínsia Bali -Indonézia kona-ba posibilidade atu sosa karau.

“Ami sei haree hamutuk kona-bá nesesidade sira, liuliu iha área pekuária. Ami seidauk bele hateten montante osan ne’ebé sei aloka, maibé ami diskute ona kona-bá posibilidade atu kontinua programa karau ne’ebé ami ko’alia ona ho Governu Bali, atu bele sosa karau husi ne’ebá,” informa Ministru Marcos da Cruz.

Governatene ne’e hatutan se iha konkordánsia entre parte rua, Governu Timor-Leste bele konsidera atu sosa karau husi Bali, tuir rezultadu negosiasaun no diskusaun ne’ebé sei hala’o.

Nia mós relata kona-bá montante orsamentu ba MAPPF sei halo ajustamentu antes debate iha plenária Parlamentu Nasionál, atu asegura katak alokasaun ne’ebé determina bele responde ba prioridade no nesesidade setór agrikultura, peskas no pekuária iha tinan 2027.

Ministru Marcos da Cruz hatete maski iha aumentu orsamentu ba bens de servisu, ministériu sei kontinua halo diskusaun atu identifika montante osan ne’ebé presiza ba programa ne’e.

Tuir aprezentasaun husi Ministru Agrikultura, Peska, Pekuária no Floresta, Marcos da Cruz ba Komisaun D  Parlamentu Nasionál, trata asuntu ekonomia no dezenvolvimentu, katak alokasaun OJE 2027 husi MAPPF ho montante US$25.197.101,  fahe ba kategoria lima, ne’ebé sei sai prioridade ba Ministériu atu ezekuta ba saláriu no vensimentu, US$7.1 millaun, hanesan ho OJE 2026.  Ba bens  servisu, iha aumentu US$ 2.6 millaun, husi US$ 2.5 millaun iha 2026 ba US$ 13.2 millaun iha 2027.

Ba transferénsia públika, alokasaun nafatin US$ 30.000.600, hanesan ho tinan kotuk, enkuantu ba kapitál menor, iha redusaun husi US$4.1 millaun iha 2026 ba US$1.8 millaun iha 2027.

Enkuantu ba kapitál dezenvolvimentu, MAPPF hetan aumentu signifikativu, husi US$ 588.289 iha 2026 ba US$2.96 millaun iha 2027, ho aumentu besik US$2.4 millaun.

Jornalista: Remigia Locatelli

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!