Noticias

AJAR Konsidera PGR Protetor Ba Mafia Scam Call Centre

todayOctober 16, 2026 153

Background
share close

Díli, 16 Outubru 2026 (RAFA)— Organizasaun Sosiedade Sivíl, Asia Justice and Rights (AJAR), konsidera Prokuradór Jerál Repúblika (PGR), Nelson de Carvalho ne´ebé lidera Ministériu Públiku,  proteze de’it mafia sira Scam Call Centre, tanba  investigasaun no akuzasaun la forte hodi kombate krime  organizadu kontinua buras iha Timor-Leste.

Diretór Ezekutivu AJAR José Luís de Oliveira hatete bá Jornalista sira iha INFORDEPE Balide sesta-ne’e katak, prosesu invesitgasaun ne’e kleur, tanba setór  justisa ne’e agora sabraut, hahú husi nomeasaun Tribunál Rekursu  no prokuradór jerál Repúblika.

“Agora ita presiza kestiona, Prezidente Repúblika nomea sira  ne’e intensaun sáida, intensaun ne’e atu serbí ita nia Estadu ne’e sai di’ak liu ka atu hafraku ita nia Estadu, tanba kazu Scam Call Centre ne’e akuzasaun fraku, sira lori duni bá tribunál, polísia mak kaer iha kintu-kantu, maibé tuir lei ne’e lidera husi Prokuradór, Ministériu Públiku tenke halibur evidénsia forte, atu halo akuzasaun forte, se lae arguidu sira ne’e sei libertadu hotu, iha faze julgamentu normal,” hatete  Diretór Ezekutivu AJAR José Luís de Oliveira.

Tuir nia  katak, bainhira Xefe Estadu  nomea bá ema ruma  la’ós bazea bá negosiasaun ilegál sira-ne’e, tanba ne’e tuir nia katak,  Prokuradór Jerál Repúblika sira ne’e envole iha mafia Scam Call Centre.

“Ha´u dehan hanesan ne’e tanba ha’u mós halibur informasaun, tanba ne’e maka órgaun ida-ne’e la funsiona  atu serbí justisa bá povu, Prokuradór Jerál  la funsiona atu lídera  Estadu iha liu-liu iha setór justisa atu kombate kriminozu sira maibé Proteze kriminózu sira,” nia deha.

Nia observasaun katak, Ministériu Públiku ne’ebé lidera husi Prokuradór  Jerál Repúblika  Nelson de Carvalho, durante ne’e orienta  invetigasaun fraku bá iha kazu Scam Call Centre ne’ebé dadaun ne’e buras iha teritóriu Timor.

Nia funndamenta, prosesu sira ne’ebé la’o iha Ministériu Públiku la tuir prosedimentu   lei legál sira, nia fó ezemplu katak foin dadaun ne’e Ministériu Públiku  ho tribunál emite mandadu kapturasaun atu halo detensaun bá sidadaun Austrálianu iha Aileu, tanba de’it  nia denunsia informasaun mafia iha tribunál.

Nia subliña, hafoin sira bá kaer saída maka akontese, tribunál  liberta tanba laiha evindesia, maibé prkuradór ida maka emite mandadu kapturasau ne’e, laiha evidensia hanesan  mós bele akontese.

“Ne’ebé agora dadaun ne’e institusaun Prokuradór ne’e funsiona atu proteze sé, interese Estadu ka interese bandidu sira nian, ha’u dehan hanesan bandidu, tanba ema sira envolve iha Scam Call Centre ne’e Bandidu ne’e mafiozu, lia-fuan seluk karik  ita bele dehan bandidu,”  nia dehan.

Nia afirma, Prokuradór Jerál simu osan estadu, nia funsaun atu halo sáida,  tanba kazu korrupsaun sira  ne’ebé maka CAC invetiga hela  Ministériu Públiku dada hotu ne’e intesnaun saída.

“Ha’u kestiona ida-ne’e tanba  ha’u nia direitu umanu, kontisaun konsagra direitu bá informasaun, nia tuur iha órgaun Estadu nia tenke servisu bá interese Estadu, intesese Povu la’ós bá interese grupu mafiozu sira,”  nia  konklui.

RAFA tenta  atu halo komfirmasaun bá Prokuradór Jerál Repúblik Nelson Carvalho, maibé tempu laiha ho razaun katak  zoom meeting  ho Prokuradór ASEAN Rejionál sira kona-bá kazu Scam Call Centre.

Jornalista: Marcelino Tomae

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!