Noticias

Loron Nasionál Liberdade Imprensa 2026, Ramos-Horta Husu Públiku Respeita Jornalista

todayOctober 16, 2026 63

Background
share close

Díli, 16 Outubru 2026 (RAFA)- Prezidente Repúblika, José Ramos-Horta liu husi mensajen ofisiál ba komemorasaun Loron Nasionál Liberdade Imprensa ba dala-IV, (16 Outubru 2022-2026), husu públiku respeita kontribuisaun jornalista sira nian iha transparansia públika ba konstrusaun estadu demokrátiku.

Iha loron nasionál liberdade imprensa ne´e, Xefe Estadu hakarak reafirma fila fali dala ida tan, kompromisu metin ho liberdade imprensa, liberdade ko’alia nian, liberdade espresaun, ne´ebé hanesan prinsipiu ne’ebé importante tebe-tebes ba konstrusaun no konsolidasaun estadu demokrátiku.

“Respeita ba kontribuisaun jornalista sira, no mídia sira seluk, ne’ebé sira fornese informasaun ba públiku. Sira nia kna’ar, fahe informasaun, informasaun ne’ebé di’ak ho integridade, promove debate, partisipasaun sidadaun sira. Nune’e kontribui haforsa ba transparansia iha vida públiku,” hatete Prezidente Repúblika, José Ramos-Horta, iha nia mensajen ba loron importante ne´e.

Ramos-Horta hatete nu´udar Prezidente Repúblika mós apela ba jornalista, no instituisaun mídia sira hotu-hotu atu kontinua halo kna’ar ho responsabilidade, ho matenek, ho indepedénsia, ho profesionalizmu, ho respeitu ba étika jornálistika.

Importante tebe-tebes hotu-hotu garante ambiente ne’ebé seguru, favoravel ba jornalista sira, atu sira bele halo, sira nia kna’ar asesu ba informasaun, protesaun fontes informasaun, integridade, profesionál tuir lei no prinsipiu demokrátiku.

Xefe Estadu enkoraza ba instituisaun estadu, média, organizasaun jornalista, sosiédade sivil, sidadaun sira hotu, atu hametin kultura dialógu, toleránsia, pluralizmu no respeitu ba opiniaun ruma ne’ebé oin seluk husi ita nian.

“Ha’u halo apelu, atu ita uza média no plataforma dijitál ho responsabilidade, liu-liu iha kombate des-informasaun (informasaun faslu), hodi ita bele proteze kualidade debate públiku, no konfiansa sidadaun sira nian ba informasaun,” Ramos-Horta dehan.

Jornalista: Cristina Ximenes

 

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!