Liga Voleibol Primeira Divizaun, Ekipa Feto Choque Halakon Kablaki 3-1

Ekipa voleibol feto Choque.

Díli, 15 Outubru 2026 (RAFA)- Ekipa voleibol feto Choque susesu halakon nia adversáriu Kablaki ho score 3-1 iha jogu kontinuasaun Liga Voleibol Feto Timor-Leste, primeira divizaun ne’ebé hala’o iha Jináziu Desportu Díli (GDD), Kuarta-ne’e.

Iha set dahuluk, ekipa rua hatudu kapasidade no kompetitividade aas, ho diferensa pontu ne’ebé estreitu.

Kablaki, ne’ebé hatun jogadór estranjeiru na’in-rua iha jogu ne’e, aproveita oportunidade atu buka pontu no lidera ho rezultadu 24-21.

Maski nune’e, Choque kontinua mantein disiplina no organiza bloku ho di’ak atu soke hasoru atake adversáriu nian. Maibé, iha momentu krusial, Kablaki konsege taka set dahuluk ho vitória 28-26.

Tama ba set daruak, Choque ne’ebé lakon iha set dahuluk, hatudu reasaun forte liu husi dominasaun iha atake, bloku no pase ne’ebé efetivu, hodi limita oportunidade Kablaki atu responde.

Ho ritmu no tátika jogu ne’ebé organizadu, Choque konsege manán set daruak ho diferensa pontu boot, 25-15.

Iha set datoluk, Choque kontinua domina jogu no aumenta presaun ba Kablaki. Ekipa ne’e la fó espasu ba nia adversáriu atu dezenvolve nia jogu, hodi taka set datoluk ho rezultadu klaru 25-10.

Tama ba set da-haat, ne’ebé sai determinante ba rezultadu finál, Kablaki koko nafatin atu aumenta pontu no lori kompetisaun ba set seguinte. Maibé, Choque kontinua hatudu konsentrasaun, forsa no koordenasaun di’ak entre jogadór sira, hodi manán set da-haat ho rezultadu 25-15.

Jornalista: Davilio Valdamir