Ouvir RAFA Ritmo, Voz e Coração de Timor
CEO ETO, Nilton Telmo Gosmão dos Santos, foto hamutuk ho partisipante sira atividade Rotary Youth Leadership Awards Timor-Lorosa’e (RYLA-TL) CAMP 2026.
Díli, 14 Outubru 2026 (RAFA)- Xefe Ezekutivu (CEO, sigla inglés) grupu empreza Esperança Timor Oan (ETO), Nilton Telmo Gusmão dos Santos, fó hanoin ba juventude Timor-oan sira atu la depende de’it ba koñesimentu ne’ebé hetan iha eskola, maibé tenke dezenvolve mós abilidade sira iha prátika hodi prepara an ba futuru.

Nilton Telmo Gusmão dos Santos hato’o nia palestra ne’e iha atividade Rotary Youth Leadership Awards Timor-Lorosa’e (RYLA-TL) CAMP 2026, ne’ebé realiza iha Salaun Madre PRR, Manleuana, Díli, Kuarta-ne’e, hodi subliña tan katak atividade hanesan RYLA promove ne’e importante tebes atu ajuda juventude dezenvolve koñesimentu no kapasidade ne’ebé la limita de’it ba matéria iha kuríkulu eskola, maibé prepara sira atu enfrenta dezafiu iha moris loroloron no futuru.
“Bainhira ha’u simu konvite husi RYLA, ha’u sempre dehan sim, ha’u hakarak ba, tanba hakarak fahe esperiénsia ho imi. Tanba ohin ita nia sosiadade eskola de’it mós iha preokupasaun husi ema barak katak, iha eskola ita la konsege organiza hodi hanorin ita nia ema ho di’ak liu,” hatete Nilton Telmo Gusmão dos Santos
CEO ETO ne´e hatutan, atividade hanesan RYLA organiza ne’e atividade ne’ebé di’ak tebe-tebes atu bele eleva joventude sira-nia koñesimentu husi aspetu ida ne’ebé diferente husi buat ne’ebé aprende iha banku eskola.
Nia esplika, moris iha dezafiu, difikuldade, iha mós solusaun, maibé oinsá mak bele konsege jere iha atividade ka moris loro-loron hanesan joven, família ka hanesan lideransa ruma.
Tuir Nilton Gusmão nia hatene, iha RYLA foku liu atu hanorin imi atu sai lideransa, signifika imi mós iha potensia atu sai lideransa iha futuru. Tanba, lideransa ne’e katak, la’ós tenke númeru dahuluk, lideransa signifika tenke iha kbiit atu organiza saida mak ema fó konfiansa ba atu halo.
“Entaun ha’u deside halo atividade ruma iha rai ida ne’e, atividade ne’ebé momentu ne’eba ami halo mak estasaun rádiu ida naran Rádiu FALINTIL a Voz de Esperança. Fatin ne’ebá sai tiha sentru hodi halibur foinsa’e sira. Rádiu ne’e foin re-estabelese fila iha tinan ida ne’e nia laran, agora la’ós ona rádiu FALINTIL, maibé habadak tiha sai tiha Rafa,” nia dehan.
Nilton Gusmão afirma, husi rádiu depois la’o tinan ida ka rua, hahú infrenta difikuldade tanba labele sustenta an, laiha reseita ruma atu bele kontinua mantein atividade.
Husi ne’ebá, Nilton Gusmão fó lembra katak hamosu nia inisitiva, hodi hahú envolve iha atividade ekonómika prátika. Momentu ne’ebá ho tulun nia aman (Saudozu Gilman Santos), buka hakbesik ba empreza internasionál sira ne’ebé koopera hela atividade iha rai-laran.
Entaun momentu ne’eba iha kompaña ida malae australianu ida nian, nia halo distribuisaun komustivel hamutuk ho empreza seluk ba atividade operasaun Forsa da Pas mai hela iha ne’e.
Tanba ne’e hakbesik ba sira, hodi husu oportunidade ruma ne’ebé iha hodi halo atividade sira ne’e. Nune’e, Nilton Gusmão konsege manan konfiansa husi sira, husi buat kiik ne’ebé nia hahú komesa dezenvolve no transforma atividade ne’e sai tiha atividade ida ne’ebé ho forsa rasik.
Grupu empreza ETO daudaun ne’e sai mahon ba nia empreza subsidiáriu hamutuk 18 mak hanesan ETO Moving, G&S konstrusaun sivíl, GOTA, Santos Living, Detile, D’City Hotel, ETO-TELCO (Rafa), ETO Gas, VIP Gas, ETO the aviation service company, KTON, ETO E&P, Nine Aparel, Ti-Oan Fintech, Hotel Timor, Supernine, Timor Telecom ho mós Parke Industriál (Indústria no Fabrikasaun) iha Manatuto.
Dezavia Daniel Ricardo do Carmo, partisipante iha RYLA-TL CAMP 2026, sente oportunidade di’ak ba nia, tanba durante iha eskola sekundáriu ladun hetan matéria sira halai liubá ekonómia.
“Entaun mai iha konferénsia ida ne’e, ohin ha’u hetan matéria husi CEO ETO aprejenta kona-bá oinsá atu hala’o produtividade iha ita nia área ekonómia nian. Ha’u sente orgullu tebes tanba ha’u juventude ida ha’u bele iha oportunidade atu bele aprende matéria refere husi CEO ETO,” hatete Dezavia Daniel Ricardo do Carmo hateten.
Iha biban ne’e, direitór ba programa RYLA-TL CAMP 2026, Alberto Quintão de Oliveira hatete, atividade RYLA hanesan formasaun lideransa husi rotary ba iha foin-sa’e.
“Kada tinan RYLA organiza programa formasaun ida ne’e no partisipante ba kada tinan ninian ema na’in-86, kompostu husi feto na’in-43 no mane na’in-43, ami halo selesaun envolve munisípiu hotu-hotu,” Alberto Quintão de Oliveira informa.
Hafoin fo palestra partisipante RYLA-TL CAMP 2026 entrega mós lemoransa hanesan tais no sertifikadu apresiasaun ba CEO ETO Nilton Telmo Gusmão dos Santos hanesan agradesimentu tanba partilla ona hanoin murak sira ne´ebé bele tulun foin-sa’e sira atu halo transformasaun iha sira-nia moris ne´e.
Jornalista: Cristina Ximenes
Written by: RafaFM
Juventude Tenke Prepara An Enfrenta Realidade Moris
todayNovember 20, 2026 13 2
Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.
Copyright Rafa.tl - Desenvolvido por Justweb.pt