Noticias

Timor-Leste Presiza Indústria Barak Liután

todayOctober 14, 2026 158 1 5

Background
share close

Díli, 14  Outubru 2026 (RAFA)- Xefe Ezekutivu (CEO, sigla inglés) grupu empreza Esperança Timor Oan, (ETO), Lda, Nilton Telmo Gusmão dos Santos, apela ba Timor-oan sira atu muda mentalidade no fó apoiu ba produtu lokal, hodi hametin indústria nasionál, kria empregu no promove dezenvolvimentu ekonómia sustentável iha Timor-Leste.

CEO ETO,  Nilton Telmo Gusmão dos Santos, hato’o opiniaun  ne’e bainhira sai oradór xave iha atividade Rotary Youth Leadership Awards Timor Loro-sa’e (RAYLA-TL) CAMP 2026, Kuarta-ne’e, iha Salaun Madre PRR Manleuana.

CEO ETO, Nilton Telmo Santos Gusmão hato’o palestra iha atividade Rotary Youth Leadership Awards Timor Loro-sa’e (RAYLA-TL) CAMP 2026.

Atividade RAYLA-TL 2026 ho tema “Dezenvove Sétor Produtivu ba Sustentabilidade Ekónomia” ne’e, Nilton Gusmão, enkoraja foin-sa´e sira oinsá aproveita oportunidade hodi kapasita an no hamoris espíritu luta liu husi esforsu pessoal atu kontribui ba dezenvolvimentu nasionál Timor-Leste nian.

“Timor tenke iha indústria barak liután, la’ós iha projetu mak barak,”  Nilton Telmo Gusmão dos Santos afirma.

Nia  mós hatete, falta balansu entre númeru ema buka servisu no oportunidade empregu ne’ebé disponivel iha merkadu doméstiku sai dezafiu ida ba dezenvolvimentu nasaun. Nune’e, nia enkoraja juventude sira atu kria ideia inovadór no buka oportunidade iha setór produtivu, inklui agrikultura, prosesamentu ai-han no indústria lokal.

Emprezariu Timor-oan ne´e subliña katak, dezenvolvimentu indústria lokál la depende de’it ba emprezáriu sira, maibé mós ba konsumidór sira ne’ebé hili atu sosa produtu ne’ebé produz iha rai-laran.

Tuir nia hanoin, bainhira konsumidór sosa produtu lokal, sira ajuda kria demanda ba produsaun nasionál, sustenta negósiu lokál no fó oportunidade empregu ba Timor-oan sira. Nune’e, se konsumidór kontinua prefere produtu importadu, indústria lokal sei enfrenta difikuldade atu dezenvolve no kontinua iha merkadu.

“Hahú sente orgullu ba ita nia produtu, hadomi ita nia produsaun rai laran,” nia hateten.

RAYLA-TL etrega sertifikadu apresiasaun ba CEO ETO, Nilton Telmo Santos Gusmão.

Nilton Gusmão mós hato’o importánsia atu aumenta produsaun agríkola, hanesan hare, kafé no ai-farina, atu bele transforma matéria-prima lokal ba produtu ne’ebé iha valor ekonómiku.

Timor-Leste tenke hametin ligasaun entre produsaun agríkola, indústria no merkadu, atu osan ne’ebé povu gasta bele kontinua movimenta iha ekonomia doméstika.

CEO ETO ne´e haktuir, iha nia esperiénsia emprezariál sempre destaka prinsípiu tolu ne’ebé konsidera importante atu atinje susesu, mak mehi, esperansa no onestidade.

Nilton Gusmão espera, esperiénsia ne’ebé nia fahe bele inspira juventude Timor-oan atu muda mentalidade, kria oportunidade ekonómika no kontribui ba harii indústria nasionál ne’ebé forte no sustentável.

Grupu ETO iha nia empreza subsidiáriu  hamutuk 18 mak hanesan ETO Moving, G&S konstrusaun sivíl, GOTA, Santos Living, Detile, D’City Hotel, ETO-TELCO (Rafa), ETO Gas, VIP Gas, ETO the aviation service company, KTON, ETO E&P, Nine Aparel, Ti-Oan Fintech, Hotel Timor, Supernine,  Timor Telecom ho mós Parke Industriál (Indústria no Fabrikasaun) iha Manatuto.

Jornalista: Cristina Ximenes

 

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!