LFTL Propoin US$300.000,00 Ba Liga Époka 2026-2027

Prezidente Liga Futeból Timor-Leste, Ipolito Soares.

Díli, 13 Outubru 2026 (RAFA) -Prezidente Liga Futeból Timor-Leste  (LFTL), Ipolito Soares, Tersa ne’e, informa sira submete ona proposta orsamentu ho montante US$300.000,00 ba Ministériu Juventude, Desportu, Arte no Kulturál (MJDAC), atu hetan apoiu hodi organiza Liga Timorense époka 2026 ba jogu sira iha primeira volta.

LFTL sira-nia parte hein de’it konfirmasaun ofisiál husi MJDAC kona-bá apoiu ba Liga Timorense Époka 2026–2027, liuliu ba jogu sira iha primeira no segunda volta.

“Ba Liga iha primeira volta ne’e, ami hatama ona proposta orsamentu besik US$300.000,00 ba segunda volta, ne’ebé sei hahú iha fulan-Novembru to’o Dezembru, ami sei hein nafatin,”  Ipolito Soares subliña.

Nia dehan  to’o agora sira seidauk hetan informasaun ne’ebé klaru kona-ba montante orsamentu ne’ebé submete ba MJDAC. Karik iha semana ida ne’e, sira bele hetan ona konfirmasaun kona-ba montante ne’ebé sei aprova.

Antes ne’e Ministru Juventude, Desportu, Arte No Kultura (MJDAC), Nélio Isaac Sarmento informa katak  Ministériu sei kontinua fó apoiu ba liga Timorense Primeira Divizaun époka 2026-2027. Maibé, montante orsamentu sei depende ba maneira organizasaun sira ezekuta no jere orsamentu ne’ebé simu husi Governu.

“Tinan uluk iha US$500.000,00 bele aumenta depende ba sira nia ezekusaun, bele mós menus. Ha’u dehan ita tenke iha responsabilidade ba orsamentu ne’ebé ita simu bainhira governu fó ba ita,” afirma  Ministru Nélio Isaac.

MJDAC simu ona proposta husi órgaun liga Futebol Timor-Leste no aloka ona orsamentu ba Federasaun Futebol Timor-Leste  atu apoia programa no kompetisaun desportiva.

Ba oin sira sei kontinua halo monitorizasaun ba jestaun no ezekusaun orsamentu ne’ebé FFTL simu, inklui haree programa sira ne’ebé planeadu hala’o tuir planu ka lae.

Jornalista: Marito da Costa