Noticias

Polísia Feto Hotu Tenke Profisionál no Trata Sidadaun sira Tuir Lei ho Orden

todayOctober 13, 2026 12 8

Background
share close

Díli, 13 Outubru 2026 (RAFA)- Komandante Jerál Polísia Nasionál Timor-Leste (PNTL), Komisáriu Asistente Polísia Afonso dos Santos, husu polísia feto hotu tenke sai ezemplar ba povu tomak, sai lideransa di’ak ba iha futuru, kontrola an no proteje povu tuir Lei no Orden.

Komisáriu Asistente Polísia Afonso dos Santos haktuir iha nia diskursu ba konferénsia nasionál Polísia Femenina iha Sentru Konvensaun Díli (CCD), Tersa-ne’e, ho tema “Lideransa, Profesionalismu no Futuru Instituisaun” ho objetivu atu hametin integrigade instituisaun PNTL no konsolida no hasae profesionalizmu Polísia Femenina iha atuasaun sira tuir Lei no Orden.

“Ha’u sente kontenti no orgullu tanba iha oportunidade atu hasoru malu, mai aprende hamutuk kona-bá papel feto PNTL, lideransa profesionalismu, no kontribuisaun ba feto iha dezenvolvimentu instituisaun PNTL agora no ba futuru. Servisu polísia iha responsabilidade boot no dezafiu oi-oin ne’ebé presiza iha korajen, disiplina, preparasaun no maturidade, tanba ne’e imi labele duvida ho imi nia kapasidade,” Komisáriu Asistente Polísia Afonso dos Santos hateten.

Komandante Jerál PNTL hatutan, polísia tenke hatudu nia profesionalismu kumpri Leí, respeita direitus umanus no mantein disiplina.

“Uza autoridade ho responsabilidade no trata sidadaun hotu-hotu justisa, ha’u repete tan dala ida trata sidadaun ho justisa ita nia kompetensia integridade no rezultadu servisu mak prova importante husi ita nia kapasidade. Ha’u kompriende katak feto PNTL balun iha responsabilidade servisu família no komunidade, tanba ida-ne’e ita presiza jere tempu ho didi’ak tau matan ba saúde no bem estar buka apoiu bainhira presiza,” tenik nia.

Komisáriu Asistente Polísia Afonso dos Santos rekomenda, feto PNTL tenke iha oportunidade atu dezenvolve kapasidade no kontribui iha área operasional, investigasaun, planeamentu, jestaun no lideransa tuir kompetensia profesionál.

Iha fatin hanesan Xefe Jéneru PNTL, Superintendente Asistente Polísia Maria Fatima, iha diskursu husu Polísia Feto hotu kontinua hametin kapasidade lideransa no hasa’e profesionalismu hatudu respeitu ba direitus umanus.

“Ita haree ba tema ne’e hatudu katak ‘Lideransa, Profesionalismu no Futuru Instituisaun’ femenina iha Polísia Nasionál Timor-Leste iha objetivu atu hametin kapasidade lideransa, hasa’e profesionalismu disiplina promove igualidade no oportunidade prevene diakriminasaun ba asediu seksuál, hametin partisipasaun feto iha prosesu foti desizaun dezenvolvimentu iha instituisaun Polisia Nasionál Timor-Leste” hatete, Superintendente Asistente Polísia Maria Fatima.

Joranlista: Juvinal Cabral

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!