Noticias

Ministru Interiór Garante Fatin Formasaun Ba Kadete PNTL iha Kondisaun Di’ak

todayOctober 12, 2026 26

Background
share close

Díli, 12 Outubru 2026 (RAFA)- Ministru Interiór (MI), Francisco da Costa Guterres , garante fatin formasaun ba kadete PNTL foun iha Rairobo, Atabae no Sentru Formasaun Comoro iha kondisaun di’ak no sei akumula kandidatu sira hotu tuir nesesidade.

Ministru Interiór hato´o kestaun ne´e hodi hatan ba preokupasaun sosiedade sivil, liu-liu Fundasaun Mahein nian relasiona ho preparasaun no fatin formasaun ba kadete PNTL foun sira.

“Sira seidauk to’o iha ne’ebá, ne’ebé sira seidauk hatene saida mak ami halo, ha’u lakohi komentáriu mais ita sei tau sira iha ne’ebá Comoro, Rairobo ho tan iha Atabae. Prosesu ne’e la’o hela ita halo preparativu ba sira ne’ebé faze rekrutamentu ne’e ita espera katak hotu lalais iha fulan ida ne’e nia laran, fulan-Outubru primeiru turnu ne’e tama ona iha formasaun ita espera katak fulan-lima to’o neen sira  preparadu ona para atu bele hala’o servisu iha instituisaun PNTL”, hatete Francisco da Costa Guterres ba joranlista sira iha Díli, Segunda-ne’e.

Ministru Interiór esplika,  governu hamutuk ho Komandu Jerál PNTL  iha ona mekanizmu hodi identifika fatin atu konstrui fatin formasaun permanente nune’e prepara ba futuru rekrutamentu akumula ema barak.

“Fatin Komandu identifika hotu ona, haree hotu ona sentru formasaun di’ak hela, Rairobo mós di’ak hela, tanba ita ba hadi’a hotu ona agora dadaun ita hadi’a tan, foti sai para atu bele simu ema to’o rihun ida (1.000) iha ne’ebá Rairobo nian. Agora dadaun tama ona faze dezeñu buat hotu, espera katak la kleur ita halo konstrusaun para depois tinan oin  ita iha ona espasu ne’ebé mak bele simu ema rihun ida(1.000) iha ne’ebá,” nia esplika.

Ministru Interiór, fó konfiansa nafatin ba Komandu Jerál PNTL  bele fó formasaun tuir mekanizmu ne’ebé mak sira utiliza no la’o ho di’ak.

Jornalista: Juvinal Cabral

 

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!