Noticias

PM Xanana Kestiona Desizaun Tribunál Kona-bá Arguidu sira Kazu Scam Call Centre

todayOctober 12, 2026 176

Background
share close

Díli, 12 Outubru 2026 (RAFA)- Primeiru Ministru, Kay Rala Xanana Gusmão, kestiona desizaun Tribunál Díli nian kona-bá arguidu sira   kazu Scam Call Centre no husu jornalista intensifika reportajen hodi kontribui ba hadia sistema justisa iha país ne´e.

“Kuandu krime organizadu sira hanesan ne’e, la’ós fali ida de’it hotu ona tenke tuir nafatin, kaer nafatin, krime organizadu ne’e sira halo tiha mak depois ita para ne’e sira mai tan. Haruka hotu  ba tiha ona Indonézia lubuk ida kedas, Xina mós mai foti lori kedas,” Xanana Gusmão. hateten.

Primeiru-Ministru mós husu ba jornalista sira tenke halo koobertura barak kona-bá sistema justisa iha Timor-Leste, jornalista mak tenke hakilar.

“Juis ne’e hein de’it ema sira ne’e hatene lei de’it, imi mak tenke hakilar la’ós ha’u, Tribunál mak liberta tiha. Sistema justisa ne’e mak, feto kamponezes ida iha fronteira ne’ebá ha’u koñese nia naran tanba Prezidente mak hakerek ba Governu husu atu fó indultu, hatene tanba sa? Tanba hatama tabaku, kaer tiha Tribunál fó prizaun tinan rua. Tanba nia sala boot ne’e nia hatama hanesan ne’e la hatama reseita ba estadu prizaun tinan rua, Tribunál ne’e kapaz tebe-tebes, juis sira ne’e matenek tebe-tebes, hatene Leí, señora oan ne’e kuitadu hatama tabaku prizaun tinan rua, ema joga Scam ita nia rai paraiju boot ne’e hatama  millaun US$42, Polísia kaer Tribunál dehan lae, haruka hasai”, PM Xanana lamenta.

Xefe governu afirma, Timor-Leste la fó dalan ba  krime organizadu transnasionais Scam Call Centre, nune’e, husu atu estranjeiru sira labele kontinua prátika atividade ilísitu.

Iha fatin hanesan Ministru Interiór, Francisco da Costa Guterres hatutan, agora tenta re-organiza iha ona despaixu ministerial  no Leí autoriza ema ida mai ho vistu turista ba loron 30 atu extende dala ida de’it.

“Kestaun liga ho krime sira por ezemplu online, Scam buat sira ne’e hotu depois halo diskusaun iha ne’ebá husu orientasaun ba Primeiru Ministru, ami haree hotu ona, estuda hotu haree katak ita tenke hapara tiha extensaun vistu turista ne’e”, hatete Ministru Interiór Francisco da Costa Guterres.

Ministru Interiór subliña, laiha turista ida hela iha Timor-Leste durante fulan rua, oinsá nia osan alozamentu. Tanba ida-ne’e mak turista nia hela iha ne’e semana ida ka rua bele fila ona kuandu liu ne’e tenke deskonfia nia halo atividade ruma.

Jornalista: Juvinal Cabral

 

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!