Ouvir RAFA Ritmo, Voz e Coração de Timor
CPLP atribui Prémiu Eselénsia Luzófona ba saudozu antigu Prezidente Repúblika Timor-Leste, Francisco Guterres Lú-olo, iha ámbitu komemorasaun aniversáriu CPLP ba dala-30 ne’ebé hala’o iha Estoril Munisípiu Cascais, Portugál. Imajen/MNEK
Portugál, 12 Outubru 2026 (RAFA)- Comunidade dos Países de Língua Portuguesa (CPLP) atribui Prémiu Eselénsia Luzófona ba saudozu antigu Prezidente Repúblika Timor-Leste, Francisco Guterres Lú-olo, iha ámbitu komemorasaun aniversáriu CPLP ba dala-30 ne’ebé hala’o iha Estoril Munisípiu Cascais, Portugál.
Prémiu Eselénsia Luzofonia ne’e entrega diretamente husi Ministru Negósiu Estranjeiru no Kooperasaun Timor-Leste, Bendito Freitas ho kualidade hanesan Prezidente Konsellu Ministru CPLP biéniu 2026-2027, ba Espoza Saudozu Prezidente Lú-Olo, Cidália Lopes Nobre Mouzinho Guterres, akompaña husi sira-nia oan-mane na’in rua, Aldino Nobre Guterres no Felezito Samora Guterres.
Prémiu Luzofonia ne’ebé CPLP atribui ba Saudozu Prezidente Lú-Olo, nu’udar aktu rekoñesimentu ba saudozu nia kontribuisaun iha luta ba libertasaun pátria durante tinan 24, no konstribui sira iha prosesu konstrusaun estadu hahú husi Asembleia Konstituente no primeiru Prezidente Parlamentu Nasionál hodi aprova Konstituisaun RDTL, Prezidente Repúblika no mós kontribuisaun ba komunidade luzófona, no reafirma kompromisu atu hametin solidariedade, respeitu mútu no kooperasaun entre Estadu-Membru sira CPLP nian.
Komunikadu ofisiál ne’ebe RAFA asesu, Segunda-ne’e, espoza Saudozu Prezidente Lú-olo, Cidália Lopes Nobre Mouzinho Guterres hato’o agradese ba komisaun organizadora ne’ebé atribui ona Prémiu Eselénte Luzófona hodi rekoñese Saudozu Prezidente Francisco Guterres Lú-olo nia konstribuisaun dezde iha tempu luta ba ukun rasik to’o iha prosesu konstrusaun estadu no nasaun iha área oi-oin.
“Lori família Francisco Guterres Lú-olo, ha’u-nia oan sira no mós família sira hotu agradese ba komisaun organizadora ba Prémiu de Gala Luzófona ne’ebé rekoñese Prezidente Lú-Olo hodi fó Prémiu Eselénte Luzófona ba Prezidente Lú-Olo. Ha’u-nia diskursu hato’o katak, ha’u labele ko’alia iha nia fatin, maibé, iha nia video no diskuru barak ne’ebé nia ko’alia kona-ba sentidu husi CPLP rasik,” hatete espoza Saudozu Prezidente Lú-olo.
Nia hatutan, iha tinan 2014, Prezidente Lú-Olo hetan fi’ar husi estadu hodi prezide komisaun organizasaun ba preparasaun ba Simeira CPLP ne’ebé Timor-Leste mak sai nu’udar nasaun anfitriaun iha Díli.
“Prezidente Lú-olo ninia kontribuisaun hanesan fen-kaben ne’ebé besik fó ha’u-nia testamuñu ba ninia serbisu tomak ba libertasaun nasaun no kontinuasaun ba konstrusaun nasaun RDTL,” tenik Cidália Lopes Nobre Mouzinho Guterres.
Nia afirma, Prémiu ne’e nu’udar rekoñesimentu ida Prezidente Lú-Olo ho ninia kompañeiru da luta sira, veteran sira inklui eroi no mástir sira ne’ebé luta durante tinan 24 nia laran no mós espesialmente ba povu Timor-Leste ne’ebé saudozu Prezidente Lú-Olo hadomi no serbí durante ninia moris tomak.
Partisipasa iha serimónia ne’e Ministru Negósiu Estranjeiru no Kooperasaun, Bendito Freitas, Embaixadora Timor-Leste ba CPLP, Natália Carrascalão, Adjunta Sekretáriu-Jerál FRETILIN, José Reis, no mós konvidadus husi estadu-membru sira hanesan Ministra Negósiu Estranjeiru no Komunidade, São Tomé e Príncipe, Ilza Amado Vaz, Sekretáriu Estadu Floresta Portugál, Rui Ladeira, Sekretária Ezekutiva CPLP, Embaixadora Maria de Fátima Jardím, Mentora no Fundadora Prémiu Gala, Isabel Leitão, kórpu diplomátiku no seluk tan.
Jornalista: Cesarina de Carvalho
Written by: RafaFM
CPLP Atribui Prémiu Eselénsia Luzofonia ba Saudozu Prezidente Lú-Olo
todayNovember 20, 2026 13 2
Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.
Copyright Rafa.tl - Desenvolvido por Justweb.pt