PNTL Asegura Inisiadór Empreza IKF Hanesan Mós Na’in Ba Raimakmor

Polísia asegura insiadór empreza IKF nu'udar mós na'in ba empreza Raimakmor, Kuarta 07 Outubru 2026.

Díli, 07 Outubru 2026 (RAFA)-Polisia Nasional Timor-Leste (PNTL), Kuarta-ne’e,  asegura inisiadór empreza Invesplar Kreativu Furak  (IKF) Lda,  ne’ebé mós hanesan na’in ba kompañia Raimakmor Lda.

Polísia foti medida ne’e bazeia ba keixa husi kliente empreza IKF na’in-200 liu, ne’ebé konsidera empreza IKF bosok sira hatama osan purvolta US$2.500,00 to’o US$18,000.00 atu bele hetan kreditu  motór no karreta.

IKF nia membru liu ona ema na’in-600 no husi sira hirak ne’e, na’in-200 liu aprezenta keixa ba Polísia tanba sira sente katak promesa kreditu karreta ho motór ne’e bosok de’it tanba sira hatama tiha osan maibé karreta ho motór la mosu to’o ohin loron.

Hafoin simu keixa, PNTL asegura kedas inisiadór empreza IKF  ho nia diretór jeral hodi kontinua ba identifikasaun no investigasaun.

Vítima Gilberta da Silva Sequeira ba jornalista sira iha edifisiu Diresaun Servisu Investigasaun Kriminál (DSIK) Komandu Jerál PNTL hateten diretór kompañia promete ba sira katak kreditu fulan tolu ne’e motór mai ona, depois kada fulan selu US$50.00 ne’e mak halo sira hanoin kreditu husi IKF  ne’e di’ak loos.

Gilberta da Silva Sequeira hatama osan US$300.00 hodi kreditu ba motór, nune’e mós osan administrasaun ketak ho montante US$35.00, iha kiente balun kreditu motór  hatama US$2.500,00 maibé  to’o ona fulan tolu motór no karreta seidauk to’o nafatin, nune’e sira hakarak ezizi atu fó fila sira nia osan.

Vítima haktuir dokumentu ne’ebé autór husi kompañia IKF sira ho nia traballador fó mak hanesan karta akordu entre parte rua aseita malu tuir artigu tolu ne’ebé kompañia prepara, inklui resibu pagamentu ne’ebé tau kedas ho karimbu kompañia nian.

“Há’u nia ne’e osan US$300.00 tanba ami kbiit laiha ne’e mak kreditu motór de’it, kolega sira  seluk hatama hira há’u lahatene,” Vítima informa.

Iha fatin hanesan traballadora husi kompania Invesplar Kreativu Furak.Lda, Natalia  haktuir, sira hanesan traballador maibé hanesan mós vítima tanba servisu durante fulan-ualu kompañia la selu sira, servisu hotu-hotu tuir orientasaun husi inisiadór kompañia.

“Ami na’in hira ne’e sai staff ba kompañia primeiru sira hahú loke kompania ida naran Malduzina, bainhira sira loke Malduzina ne’e mós sira nia programa nafatin investimentu automotif fó kreditu ba karreta no motór,” hateten Natalia.

Durante kompañia Malduzina ladún la’o di’ak sira muda ba IKF no halo promosaun katak se mak kreditu karreta kiik hatama US$250.00 ka US$300.00 to’o US$2.500,00 no kreditu karreta boot hatama US$18.000,00 no motor.

“Señór sira na’in ba empreza rasik halo enkontru ho ami na’in hira staff sira ne’e dehan katak atu asesu ba banku BRI hodi nune’e fó apoiu ba kompañia ida-ne’e. Maibé momentu ne’e sira hala’o tiha atividade harii team susesu ida la’o, maibé realidade sira bosok de’it ami, ema nia motór mós la entrega ema nia osan mós sira na’in-rua la fó fila,  sira promete iha dia 28 Setembru no  muda fali mai dia 07 Outubru-ne’e, mas  to’o agora sai problema hanesan ne’e,” traballadora ne’e afirma.

Nia informa, durante kompañia ne’e eziste sira mak sai vítima no ba mai edifisiu polísia maibé inisiador kompañia nunka mosu to’o ohin polísia ba asegura.

Traballadora haktuir prosesu hatama osan ne’e kliente sira rejistu rasik ho akordu ida katak fulan ida ka tolu entrega motór, hafoin rejistu hotu Diretór ne’e foti kedas osan maibé lori ba ne’ebé sira lahatene.

Traballador iha kompañia hamutuk 20-resin, kliente kuaze hamutuk 600-resin mak rejistu iha IKF.

Jornalista: Juvinal Cabral/ João Carlos