Noticias

Tenente Jenerál Falur Rate Laek Submete Ona Proposta Rekrutamentu Membru Foun F-FDTL

todayOctober 7, 2026 1033 2

Background
share close

Díli, 07 Outubru 2026 (RAFA)- Xefe Estadu-Maiór-Jenerál FALINTIL–Forsa Defeza Timor-Leste (F-FDTL), Tenente-Jenerál Domingos Raúl “Falur Rate Laek”  informa katak proposta rekrutamentu membru militár foun submete ona ba Ministériu Defeza,  maibé depende ba desizaun polítika Governu  nian.

“Rekrutamentu ne´e tenke halo, maibé depende ba desizaun polítika, tanba Governu mak aloka osan atu selu salariu, alimentasaun, uniforme sira, fatin toba no buat sira seluk. Ami nia planu submete ona, maibé depende ba desizaun poder polítiku nian. Tuir loloos, kada tinan tenke rekruta membru foun pelumenu na’in-150,” Tenente Jenerál Falur Rate Laek informa ba jornalista iha Kuartel-Jenerál F-FDTL, Díli, Kuarta-ne´e.

Xefe Estadu-Maiór-Jenerál  ne’e konsidera, rekrutamentu membru foun ne’e importante atu hametin efetivu F-FDTL, hadi’a kapasidade operasionál no asegura kontinuidade kumprimentu knaar iha defeza no soberania nasionál.

Nia  informa katak maski fasilidade transporte iha F-FDTL konsidera sufisiente instituisaun ne’e kontinua presiza membru militár foun  atu garante kontinuidade servisu.

Nia esplika nesesidade rekrutamentu ne’e mosu tanba kada tinan membru balun atinji ona idade reforma husi servisu militár nune’e presiza membru foun atu substitui no mantein kapasidade rekursu umanu iha instituisaun defeza nian.

Jornalista: João Carlos

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!