Ouvir RAFA Ritmo, Voz e Coração de Timor
Díli, 06 Outubru 2026 (RAFA) – JU,S Jurídiku Sosiál reiteira reklamasaun no kontinua submete rekursu kontisioza bá Tribunál Rekursu hodi kontra desizaun Konsellu Superior Majistratura Jusdisiál (CSMJ, sigla portugés) kona-bá deliberasaun transferénsia juíz na’in haat husi Tribunál Judisiál Primeira Instánsia Díli bá tribunál Oé-Cusse, Baucau no Suai.
Reprezentante JU,S liu husi Advogadu Olivio Barros, afirma hafoin simu notifikasaun foun husi Konsellu Superior Majistratura Judisiál iha loron 01 fulan-Outubru ne’e, JU,S deside reiteira reklamasaun no prepara ona atu lori kazu ne’e ba Tribunal Rekursu, ho pedidu urjente atu suspende efeitu husi desizaun CSMJ.
Nia fundamenta se CSMJ mantein desizaun atu halo transferénsia ba juiz na’in-haat ne’e, tenke destina data ho antesidensia minimu loron 30 no tenke iha rejime tranzisaun, nune’e fó tempu bá juíz sira atu organiza sira-nia prosesu ne’ebé maka sira atende hela antes ne’e
“Tuir dokumentu ne’ebé maka iha baibain prazu CSMJ deside reklamasaun ne’ebé mak antes ne’e ami submete loloos remata iha loron 16 fulan-Outubru ne’e, entaun ami haré ida-ne’e maka ami hato’o fali rekursu, ami husu revogasaun no traferénsia, no subsidiariamente ádia ezekusaun husi CSMJ nian to’o prosesu konkursu bá Supremu Tribunál Justisa no Tribunál Rekursu ne’e remata,” Advogadu Privadu Olivio Barros hateten.
Juíz na’in-haat hanesan Juíz António José Fonseca Monteiro de Jesus, Ana Paula Fonseca , José Gonçalves ho Francisca Marques Cabral, ne’ebé maka enfrenta transferénsia dadaun ne’e kaer hela kazu prosesu pendente hamutuk 746, inklui prosesu kriminál 592.
Nia fundamenta bainhira haré fila-fali bá iha CSMJ la fixa sira nia deliberasaun, la fixa data bá produsaun efeitu, entaun Juíz sira kontinua halo servisu tanba haré bá kazu pendente sira ne’e.
Nia hatutan transferensia juíz na’in-haat nian husi Tribunál Judisiál Primeira Instánsia Díli bá iha iha tribunál sira hanesan Baucau, Oé-cuse no Suai ho pozisaun JU,S ne’ebé sai mandatariu kontesta deliberasaun CSMJ kona-bá sira-nia transferénsia.
JU,S husu atu podér kolokasaun juíz sira tenke ezerse tuir lei, ho respeitu ba inamovibilidade, audiénsia prévia, fundamentasaun sira no regra movimentu judisiál
Nia afirma reklamasaun kona-bá despaisu husi CSMJ ne’e JU,S submete iha 21 fulan-Setembru, juíz sira simu notifikasaun kona-bá desizaun CSMJ ne’e foin simu iha 29 fulan-Setembru.
Iha fatin hanesan Advogada Maria Anges Bere, hatete rekursu kontisiozu bá Tribunál Rekursu, tanba haré bá Konsellu Superior Majistratura Judisiál sira laiha reuniaun, tanba JU,S reinteira fila-fali sira nia reklamasaun bá CSMJ sira atu konvoka reuniaun plénariu ne’ebé submete ona.
“Ami haré katak CSMJ sira halo reuniaun dezde fulan hira liubá tanba ne’e ami hatama fila-fali ka reiteira fila-fali ami nia reklamasaun atu deside reklamasaun ne’ebé ami submete,” Advogada Maria Anges Bere.
RAFA tenta ona halo konfirmasaun ho Prezidente Tribunál Rekursu, Afonso Carmona, iha resintu Tribunál Rekursu, maibé rejeita fó komentáriu.
Jornalista: Marcelino Tomae
Written by: RafaFM
todayNovember 20, 2026 14 2
Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.
Copyright Rafa.tl - Desenvolvido por Justweb.pt