PNTL Sei Halo Operasaun Ba Baskolante Sira Tula Rai-Henek La Taka ho Lona

Karreta baskolante ne'ebé tula fatuk-rahun no rai-henek la taka ho lona sei aplika koima.

Díli, 05 Outubru 2026 (RAFA)- Polísia Nasionál Timor-Leste (PNTL) Munisípiu Díli sei halo operasaun ba baskolante sira ne’ebé tula rai-henek la ho seguru.

Governu liu husi Sekretária Estadu Asuntu  Toponímia no Organizasaun Ubana (SEATOU)  hasai ona aviza ba karreta baskolante hotu-hotu ne’ebé tula rai-henek, fatuk no lixu, atu taka ho lona. Nune’e, asegura atu rai-henek, fatuk-rahun no lixu sira monu lekar iha estrada laran hodi provoka rai-rahun  no bele hamosu asidente tráfiku.

Komandante PNTL Munisípiu Díli, Komisariu Asistente Polísia Orlando Gomes, hateten, PNTL Díli sei halo enkontru ho parte relevante sira hodi halo operasaun ba karreta baskolante sira ne’ebé tula rai-henek, lixu no fatuk-rahun ne’ebé la taka lona tenke aplika sansaun koima.

“Uluk ami halo enkontru tiha ona ne’ebé ita halo enkontru depois ita halo konferénsia imprensa ida hodi avizu ba públiku, depois ekipa ida-ne’e halo operasaun ba fatin sira ne’ebé mak ita nia transporte tula rai-henak, ratuk-rahun atu nune’e hotu-hotu tenke taka metin ho lona,” Komisáriu Asistente Polísia Orlando Gomes, haktuir ba jornalista sira iha Díli,  Segundu-ne’e.

Orlando Gomes esplika, Polísia sei halo operasaun atu  asegura movimentu transporte baskolante sira tula rai-henek, fatuk-rahun no lixu tenke taka metin ho lona, atu nune’e, labele halo fo’er kapitál Díli.

“La kumpri ita prega multa, sé krime prosesu tuir lei. Ita hotu-hotu iha responsabilidade kuidadu ita nia sidade Díli,” Orlando Gomes hateten.

Jornalista: Juvinal Cabral/João Carlos