Tribunál Aplika Medida Kausaun US$3.500,00 Ba Arguidu Na’in-14 iha Kazu Scam Call Centre iha Comoro

Arguidu na'in-14 ba kazu scam call centre iha Otél Golgota.

Díli, 04 Outubru 2026 (RAFA) – Tribunál Judisiál Primeira Instánsia Díli, liu husi Juíza Novela Alberto Pereira, halo leitura hodi aplika medida kausaun US$3.500,00 bá kada arguidu, hamutuk arguidu na’in-14  ne’ebé deskonfia kontinua halo atividade jogu ilísitu scam call centre iha rezidénsia ida iha Kampu Baru, Comoro.

Iha audénsia julgamentu prirmeiru interogátoriu iha Tribunál Judisiál Primeira Instánsia Díli, Prokuradór Matias Soares ne’ebé reprezenta Ministériu Públiku akuza arguidu sira ho krime lima, hanesan burla informátika, asosiasaun kriminoza, brankeamentu kapitál, esplorasaun jogu ilísitiu no fraude fiskal.

Durante  audénsia Julgamentu Primeiru Interogátoriu   arguidu na’in-14 hili direitu ko’alia bá tribunál. Tanba ne’e,  durante loron tolu  nia laran, (Kinta, Sesta, Sabádu), arguidu sira  konfesa  bá Tribunál  katak sira kaer telemovel la’ós atu hala’o atividade scam call centre, maibé atu komunika ho sira-nia família.

Hafoin rona tiha deklarasaun husi arguidu sira, Tribunál prosede bá alegasaun. Tanba ne’e, iha alegasaun Prokuradór Matias Soares, solisita  ba Tribunál  atu halo alterasaun bá medida kausaun antes nian  ho montante US$2.500,00 bá US$3.500,00.

Prokuradór Matias Soares rekore bá Tribunál atu aplika médida koasaun  termu identidade bá rezidénsia (TIR), aprezentasaun periódika semana ida dala rua, ho proibisaun aujénsia.

Advogadu privadu Pedro Aparacio Guterres,  ne’ebé fó asisténsia legál bá arguidu na’in-14, husu tribunál atu liberta arguidu sira husi krime lima ne’ebé  Ministériu Públiku akuza, tanba konsidera autoridade polisiál sira halo detensaun ilegál, no arguidu sira la  halo atividade scam call centre.

Nune’e mós husu tribunál atu mantein médida   kausaun  ne’ebé aplika ona ba  kada arguidu ho montante US$2.500,00.

Hafoin rona tiha alegasaun, Juíza Novela Alberto Pereira, konsidera katak íha indísiu forte bá krime  lima  ne’ebé Ministériu Públiku imputa, nune’e  aplika médidia kausaun  bá arguidu na’in-14 kada ema US$3.500,00.

Tribunál mós aplika medida koasaun hanesan aprezentasaun periódika kada semana dala ida,  proibisaun aujénsia, no mós termu identidade bá rezidensia (TIR).

Arguidu sira ne’e parte PNTL kaptura iha loron 28 fulan-Setembru 2026, iha área Kampu Baru, Comoro, Díli.

Jornalista: Marcelino Tomae/Juvinal Cabral dos Santos