MP Solisita Ba Tribunál Aumenta Koasaun US$3.500,00 Ba Arguidu Na’in-14 iha Kazu Scam Call Centre iha Otél Golgota

Arguidu kazu scam call centre iha Otél Golgota aparenta ba julgamentu primeira interogatóriu iha TJPID, Sábadu 3 Outubru 2026.

Díli, 03 Outubru 2026 (RAFA) –Ministériu Públiku (MP) solisita ba Tribunál atu halo alterasaun bá montante medida  koasaun orsamentu ne’ebé antes  aplika  ho  valór US$2.500,00 ba kada arguidu, atu aumenta  bá US$3.500,00 bá kada arguidu  hamutuk argiudu na’in-14, tanba deskonfia kontinua halo atividade scam call centre  iha Otél Golgota, Comoro, Díli.

Iha Audénsia Julgamentu Primeiru Interogátoriu iha Tribunál Primeira Instànsia Díli (TJPID), Sábadu-ne’e, Ministériu Públiku liu husi Prokuradór Matias Soares, kondena arguidu sira ho krime-lima hanensan Burla informátika, Asosiasaun Kriminoza, Brankeamentu kapitál, Esplorasaun jogu ilísitiu no Fraude fiskal.

Durante  Audénsia Julgamentu Primeiru Interogátoriu,   arguidu na’in-14 hili diretu ko’alia bá tribunál. Tanba ne’e,   hahú  kedas primeira interogatóriu iha loron tolu nia laran  (Kinta, Sesta no Sabádu), arguidu sira  konfensa  bá Tribunál katak sira kaer telemovel la’ós atu hala’o atividade ilísitu scam call centre, maibé atu komunika ho sira nia família.

Hafoin rona tiha deklarasaun husi arguidu sira Tribunál prosede bá alegasaun. Nune’e, Prokuradór Matias Soares, solita ba  Tribunál  atu halo alterasaun bá medida koasaun antes nian  ho US$2.500,00 bá US$3.500,00.

Prokuradór Matias Soares mós rekore bá Tribunál atu aplika médidia koasaun  termu identidade bá rezidensia (TIR), aprezentasaun periódika semana ida dala rua ho proibisaun aujénsia (arguidu sira labele sai husi territóriu Timor).

Medida koasaun (ka medida de coação iha lia-portugés) mak meius ka providénsia legál sira ne’ebé juis aplika ba arguidu (ema ne’ebé hetan akuzasaun ka investigasaun ba krime ida) ho objetivu atu limita ninia liberdade ka patrimóniu durante prosesu penál la’o hela.

Tuir Kódigu Prosesu Penál  (KPP) Timor-Leste nian, medida sira-ne’e la’ós kastigu (pena), maibé nu’udar garantia de’it atu asegura katak arguidu la halai, la estraga evidénsia, la kontinua halo krime, no mós atu prosesu julgamentu bele la’o ho susesu.

Advogadu Privadu Pedro Aparacio  ne’ebé fó asisténsia legál bá arguidu na’in-14, husu tribunál atu liberta arguidu sira husi krime lima ne’ebé  Ministériu Públiku imputa, tanba konsidera autoridade polísial sira halo detensaun ilegál, no arguidu sira la  halo atividade scam call centre.

Advogadu Pedro Aparicio Guterres husu tribunál atu mantein médida enteriór tanba arguidu sira antes ne’e  kada arguidu kumpre koasaun US$2.500,00.

Hafoin rona tiha alegasaun, Tribunál liu husi Juíza Novela Alberto Pereira, adia bá  Domingu, 4 Outubru 2026, hale’u tuku:15:00  Otl, hodi halo despaisu.

Jornalista: Marcelino Tomae/Juvinal Cabral dos Santos