PPN Husu Ba Prezidente CNE Eleitu Asegura Prinsipiu Governasaun Di’ak iha Administrasaun Eleitoral

Serimonia tomada posse ba prezidente CNE ho nia membru sira iha plenária PN, Sesta 02 Outubru 2026.

Díli, 02 Outubru 2026 (RAFA)- Prezidente Parlamentu Nasionál (PPN), Maria Fernanda Lay, husu ba Prezidente eleitu Komisaun Nasionál Eleisaun (CNE, sigla portugés), Agostinho da Costa Belo Pereira, ho membru ezekutuivu hotu ba mandatu 2026-2031 atu asegura prinsipiu governasaun di’ak iha administrasaun eleitoral hodi servisu ho independente no transparante.

Prezidente Parlamentu Nasionál, Maria Fernanda Lay hato’o mensajen xave  ne´e  iha ámbitu tomada posse prezidente eleitu CNE Agostinho da Costa Belo Pereira no membru ezekutivu sira iha Parlamentu Nasionál, Sesta-ne’e.

“Órgaun administrasaun eleitorál determina husi  governasaun di’ak no kondusaun prosesu eleitorál, no konsientemente aktu kredebilidade, ita nia instituisaun demokrátika tuir kompeténsia ne’ebé konsagra iha lei,” Maria Fernanda Lay afirma.

Fernanda Lay informa, internasionalmente Timor-Leste rekoñesidu katak hanesan país ne´ebé nia eleisaun demokrátiku no pasífika liu iha pasadu no iha esperansa katak, proxima eleisaun bele di´ak liu ho kompeténsia ne´ebé órgaun foun CNE iha.

Prezidente Eleitu CNE, Agostinho da Costa Belo Pereira hatete, ne’e hanesan oportunidade, onra boot ba CNE, prosesu ida naruk, husi servisu ne’ebé CNE halo hetan apresiasaun husi órgaun importante Parlamentu Nasionál, Prezidente Repúblika, nune’e mós parte Governu, no sosiadade tomak.

Nia hateten servisu ne’ebé iha sei  atinje duni Timor-Leste ninia enkudaramentu  iha prosesu liu-liu iha nivél ASEAN, nune’e mós iha CPLP ne’ebé hetan rekoñesimentu ida ne’ebé importante tebes.

“Mandatu ida ne’e ami sei hala’o tuir ami nia juramentu ne’ebé  ami halo ida-idak, kompromente katak sei servisu ho imparsiál, dedika tomak ami nia esperiénsia ne’ebé iha, ami sente katak la mesak,” Agostinho da Costa Belo Pereira hateten.

Iha nivél CPLP, mezmu Timor-Leste rai kiik, demokrásia, foin mak komesa, maibé entre Portugál, Cavo-Verde no Timor-Leste hetan númeru datoluk kompara ho maun-alin sira iha CPLP sira seluk.

Tanba ne’e, servisu ida ne’e la’ós CNE mesak, maibé órgaun rua ne’ebé importante STAE ho CNE, liu-liu fiskalizasaun ne’ebé husi partidu polítiku sira kona-bá komportamentu eleitoral, komportamentu servisu ne’ebé CNE durante ne’e hala’o.

CNE sente katak, apresiasaun ida ne’e Timor-oan hotu nian, mézmu Timor-Leste rai-kiik, maibé nivél eleitoral demokrásia ne’ebé konsolida sai mós ezemplu ba rai seluk.

Jornalista: Cristina Ximenes