Instalasaun Eletrisidade Ilegál Potensia Boot Ba Inséndiu

Kontadór eletrisidade.

Díli, 01 Outubru 2026 (RAFA) – Sekretáriu Estadu Eletrisidade, Água no Saneamentu, Santos Noronha, esplika katak kazu inséndiu iha fatin-fatin bele akontese tanba komunidade kontinua halo ligasaun eletrisidade ilegál no instalasaun eletrisidade la tuir padraun tékniku.

Santos Noronha  hateten inséndiu bele akontese husi fator rua, inklui problema iha liña eletrisidade no ligasaun eletrisidade ilegál ne’ebé komunidade halo rasik.

Nia mós husu komunidade atu la halo instalasaun ka ligasaun eletrisidade rasik. Maibé, tenke bolu tékniku ne’ebé iha kompeténsia atu halo instalasaun, liuliu ba instalasaun eletrisidade iha uma laran.

“Ida-ne’e mak kuandu halo instalasaun iha uma laran, ha’u prefere bolu tékniku EDTL sira ne’ebé hatene liu kona-áa instalasaun ne’e, atu mai instala,” Sekretáriu Estadu Santos Noronha informa  ba jornalista sira iha Tower Fatuhada, Kinta-ne’e.

Nia alerta ba komunidade ne’ebe instala rasik bele hamusu inséndiu iha ne’ebá, tanba mosu sirkuitu buat sira-ne’e hotu nia afetasaun mak ne’e ahi bele han uma.

Hahú semana oin, EDTL halo monitorizasaun no fiskalizasaun ba servisu eletrisidade, liuliu atu identifika ligasaun eletrisidade ilegál ne’ebé bele aumenta risku ba komunidade sira-nia vida.

“Durante ne’e ita mós ladún kontrolu ba ligasaun ilegál sira. Entaun kazu ida-ne’e mós bele mosu hanesan inséndiu ne’e ita la espera,”tenik Santos Noronha.

Sekretariu estadu ne’e afirma  bainhira EDTL ba halo fiskalizasaun hetan komunidade sira ne’ebé halo ligasaun eletrisidade ilegál sei hetan multa tuir rezultadu fiskalizasaun no gravidade kazu ida-idak.

Antes ne’e mós EDTL halo ona fiskalizasaun no aplika multa ba komunidade  ne’ebé  halo ligasaun eletrisidade illegal.

Jornalista: Cesarina de Carvalho