PNTL ho Autoridade Lokál Sei Servisu Hamutuk Kontrola Atividade Ilísitu Scam Call Centre

Komandante PNTL Munisípiu Díli, Komisáriu Asistente Polísia Orlando Gomes.

Díli 01  Outubru 2026 (RAFA)– Polísia Nasionál Timor-Leste (PNTL) Munisípiu Díli sei servisu hamutuk ho autoridade lokal sira atu halo kontrolu ka supervizaun ba atividade ilísitu scam call centre iha bairru sira ne’ebé pertense ba área jurizdisaun Munisípiu Díli.

Komandante PNTL Munisípiu Díli, Komisáriu Asistente Polísia Orlando Gomes, Kinta-ne’e, hatete nia fó ona orden ba membru polísia hotu, liuliu Ekipa Sekreta no Ofisiál Polísia Suku (OPS) atu servisu hamutuk ho autoridade lokál sira hodi hasa’e patrullamentu no kontrolu ba ema estranjeiru sira ne’ebé hela iha suku no aldeia sira nu’udar parte husi esforsu prevensaun hasoru atividade ilísitu scam call centre.

“Ita orienta ona OPS sira atu servisu hamutuk ho Konsellu Polisiamentu  Komunitáriu (KPK) no lider komunitáriu sira, tanba ita fó ona formatu ba sira atu foti dadus kona-bá ema estranjeiru sira  no monitoriza nafatin atividade scamming ne’ebé akontese iha ita-nia rai laran,” Komisáriu Asistente Orlando Gomes hateten.

Komandante PNTL Munisípiu Díli husu mós ba komunidade  atu fó atensaun ba atividade ne’ebé deskonfia iha ligasaun ho krimé transnasionál no jogu ilísitu hanesan scam call centre, nune´e autroridade bele halo kedas atuasaun imediata tuir prosedimentu ne’ebé vigora.

Komisáriu Asistente Polísia ne´e subliña, esforsu koletivu entre PNTL ho autoridade lokál no komunidade sira ne’e importante tebes atu prevene no kombate atividade kriminoza sira, liuliu atividade scam call centre iha Timor-Leste.

Jornalista: João Carlos/ Juvinal Cabral