Komisaun Rekrutamentu Klarifika Prosesu Selesaun Juíz STJ

Komisaun Rekrutamentu no Selesaun bá Juís Supremu Tribunal Justisa (STJ).

Díli 01 Outubru 2026 (RAFA)– Komisaun Rekrutamentu no Selesaun bá Juís Supremu Tribunal Justisa (STJ) klarifika katak atribuisaun no kompeténsia sira iha rekizitu selesaun garante transparénsia no mekanizmu kontrolu iha prosesu rekrutamentu ba kandidatu Juíz sira ne’ebé konkore.

Membru Komisaun Rekrutamentu no Selesaun, Carmelita Caetano Moniz, Kinta-ne’e, liu husi konfensia imprensa iha salasaun Sumpremu Tribunál Justisa,  Díli, hatete katak, kona-bá alegasaun ne’ebé pesoal balun halo keixa kona-bá konduta profisionál advogadu ida ne’ebé kandidata ba vaga juís iha Supremu Tribunal Justisa, keixa ne’e la’ós hato’o ba Komisaun tanba ne´e ekipa komisaun no juri kontinua servisu ho profesional, transparante no independente tuir lei haruka.

“Organizasaun sosiedade sivíl balun iha tempu ikus ne’e hato’o ona sira-nia preokupasaun kona-bá prosesu rekrutamentu no selesaun ba juís sira bá Supremu Tribunal Justisa, nune’e mós preokupasaun balun kona-bá sirkunstánsia sira iha relasiona ho kandidatura balun,”  hatete Carmelita Caetano Moniz.

Nia esplika, keixa ne’e  loloos hato’o ba Konsellu Jestaun no Disiplina Advokasia, ne’ebé mak órgaun kompetente atu trata matéria kona-bá konduta profisionál advogadu sira.

Kona-bá pedidu atu halo dilijénsia kona-bá koñesimentu, integridade, konduta étika no profisionál, inklui rejistu kriminál kandidatu sira, Komisaun hatudu katak prosesu seleksaun iha ona mekanizmu salvaguarda no kontrolu ne’ebé estabelese iha lei.

Relatóriu graduasaun finál konkorrente sira sei organiza tuir orden klasifikasaun, bazeia ba sira-nia nota finál, husi kandidatu klasifikadu primeiru to’o kandidatu klasifikadu ikus.

Relatóriu ne’e sei haruka ba Konsellu Superior Magistratura Judisiál atu prosede ho nomeasaun Juís Konselleiru no Juís Desembargadór sira, tuir orden klasifikasaun.

Komisaun mós hatete katak, nu’udar medida salvaguarda, relatóriu graduasaun final sei haruka ba Prezidente Repúblika no Parlamentu Nasionál.

Nia dehan lei  númeru 7 artigu 174,  Estatutu Magistradu Judisiál sira, aprova liu husi Lei númeru 5/2022, 30 Marsu, determina katak iha reuniaun sira kona-ba konkursu asesu ba Supremu Tribunal Justisa no dezignasaun magistradu judisiál sira, Procuradór-Jerál Repúblika no Defensór Públiku-Jerál sei partisipa ho votu konsultivu, no labele delega sira-nia prezensa.

Carmelita Caetano Moniz afirma komisaun lembra katak atus husi Konsellu Superior Magistratura Judisiál kona-bá nomeasaun tenke publika iha Jornal da República, tuir artigu 175.º Estatutu Magistradu Judisiál sira.

Kona-bá direitu atu kontesta desizaun, Komisaun hatete katak parte sira ne’ebé iha interese lejítimu bele impugna judisialmente atus ka omisaun ilegál husi Konsellu Superior Magistratura Judisiál, tuir dispozisaun iha artigu 186.º Estatutu Majistratura Judisiál sira.

Enkuantu kona-bá potensial konflitu interese, Komisaun esplika katak membru Konsellu Superior Magistratura Judisiál ida labele partisipa iha deliberasaun bainhira matéria ne’e diretamente relasiona ho nia-an.

Nia subliña, se membru Konsellu ruma sai kandidatu ba kargu Juís Konselleiru ka Juís Desembargadór, membru ne’e sei impedidu atu partisipa iha deliberasaun kona-ba nomeasaun ne’e no sei hetan substituisaun husi membru suplente.

Komisaun Rekrutamentu no Selesaun fundamenta katak prosesu rekrutamentu no seleksaun tenke hala’o tuir atribuisaun, kompeténsia no mekanizmu transparénsia no kontrolu ne’ebé estabelese ona iha lei.

Jornalista: Marcelino Tomae