Konsellu Seguransa no Defeza Análize Ameasa Krime Transnasionál

Reuniaun Konsellu Superiór Defeza no Seguransa iha Palásiu Prezidensiál, Kinta 01 Outubru 2026.

Díli, 01 Outubru 2026 (RAFA)- Prezidente Repúblika, José Ramos-Horta, Kinta-ne’e, iha Palásiu Prezidénsial, konvoka reuniaun Konsellu Superiór Defeza no Seguransa (KSDS) hodi análize situasaun seguransa iha rai-laran, liuliu kona-ba  ameasa krime transnasional.

Primeiru Ministru, Kay Rala Xanana Gusmão informa, reuniaun ne´e hahú halo análize kritiku sira ba situasaun seguransa iha rai-laran no mos situasaun rejional no internasionál.

“Ne’eduni mai ko’alia kona-bá seguransa nasaun ninian oinusá, iha asuntu oi-oin kona-bá krime siber- seguransa, krime tráfiku droga, tráfiku ema, buat sira ne’e hotu. Ha’u dehan de’it katak, membru hotu-hotu ko’alia, atu temi dehan ami sei halo fali reuniaun Konsellu Superiór Seguransa antes fim du anu,” PM Xanana Gusmão hateten.

Xefe Governu hatutan, durante sorumutu parte hotu ho ativu hatoo ideia ba Prezidente Repúblika kona-bá situasaun real ne´ebé Timor-Leste enfrenta no servisu hotu ne´ebé PNTL iha, Polísia Sientífiku Investigasaun Kriminál (PCIC), Servisu Nasionál Intelijénsia Estratéjiku (SNIE) no mós FALINTIL-Foras Defeza Timor-Leste.

“Ha’u temi de’it katak, iha apresu, ami hotu hatudu apresu ba instituisaun seguransa ne’ebé servisu di’ak hela, maibé ita hotu hatene, buat sira ne’e tenke hadia nafati,n ita bele hetan situasaun di’ak tebe-tebes kona-ba seguransa Timor ninian,” Xanana hateten.

Xefe Governu kontinua husu ba sidadaun hotu atu  mantein situasaun hakmatek no kolabora ho autoridade seguransa no parte relevamnte hotu hodi asegura Timor-leste livre husi krimé sira ne´ebé ameasa ba estabilidade nasionál.

Jornalista: Cristina Ximenes