KAEBAUK Halo Lansamentu Ofisiál Hanesan Banku Komersiál iha Fulan-Outubru

Direijente sira husi KAEBAUK konvida Prezidente Repúblika, José Ramos-Horta atu halo lansamentu ba KAEBAUK hanesna banku komersiál iha fulan-Outubru, tinan ne'e.

Díli, 30 Setembru 2026 (RAFA)- KAEBAUK sei halo lansamentu ofisiál hanesan Banku Komersiál privadu da-huluk iha Timor-Leste iha loron 23 fulan-Outubru no ba serimónia inagurasaun KAEBAUK ho onra konvida Prezidente Repúblika José Ramos-Horta.

Diretór Ezekutivu husi KAEBAUK,  Angelo Soares hatete, Banku KAEBAUK mai hasoru malu ho Prezidente Repúblika, objetivu husi enkontru ho Prezidente Repúblika mak Banku KAEBAUK hato’o nia vizaun no kompromisu nu’udar primeiru ba Banku privadu ka Banku komersiál iha Timor-Leste, ne’ebé foka liu ba prestasaun servisu bankária ninian ne’ebé asesivel, konviavel no responsivel.

“Banku KAEBAUK mós ho onra mai konvida ofisialmente Prezidente Repúblika atu ne’e hola parte iha seremónia lansamentu Banku KAEBAUK iha 23 Outubro 2026. Depois lansamentu ofisiál Banku KAEBAUK sei loke odamatan ba kliente hotu-hotu no ba ema hotu-hotu iha 26 Outubro 2026,” hatete Diretór Ezekutivu husi KAEBAUK,  Angelo Soares ba jornalista sira hafoin enkontru ho Prezidente Repúblika iha Palásiu Prezidensiál, Kuarta ne’e.

Nia hatutan, Banku KAEBAUK sei kontinua foka maka’as ba mikro kreditu, ne’ebé sai hanesan negósia prinsipál no parte importante ida husi misaun KAEBAUK nian.

Direitór Ezekutivu ne’e mós haktuir, ida ne’e mós rekomendasaun ne’ebé husi Governadór BCTL, Helder Lopes fó hanoin ba Banku KAEBAUK, antes sai Banku katak, ba oin KAEBAUK bainhira sai Banku bele fokus ita boot sira nia negósiu, labele haluha ba mikro kreditu ninian.

Nune’e haree liu-liu segimentu ne’ebé kiik oan KAEBAUK bele tau matan, se la’e ba ona Banku, depois hotu-hotu fokus ba segimentu ida ne’ebé boot, depois se mak atu bele tau matan ba segimentu ne’ebé kiik oan iha área rurál sira ne’e.

Entretantu, Banku KAEBAUK agradese ba Prezidente Repúblika, tanba ohin bele hasoru ho KAEBAUK ko’alia, liu-liu ohin simu konvite atu bele partisipa iha seremónia lansamentu ofisiál Banku KAEBAUK.

Jornalista: Cristina Ximenes