Jurista Sérgio Quintas Husu CSMJ La Bele Kahur Interese iha Transferénsia Juíz

Jurista Sérgio Paulo Dias Quintas.

Díli, 29 Setembru 2026 (RAFA)–Jurista Sérgio Paulo Dias Quintas, husu ba Konsellu Superior Majistratura Judisiál bainhira halo deliberasaun transferénsia Juíz bá tribunál Judisiál Primeira Instánsia Díli, Baucau, Suai no Oé-cuse, tenke ho transparansia, onestidade no kualidade, la bele kahur  interese iha  laran.

Juíz na’in-sia ne’ebé kona-bá rotasaun, dadaun ne’e, Juíz na’in-haat husi Tribunál Judisiál Primeira Instánsia Díli maka seidauk distribui servisu, tanba sei iha reklamasaun, nune’e dadaun ne’e ativu hela iha Tribunál Judisiál Primeira Instánsia Díli.

“Ha’u nia hanoin bá oioin, Konsellu Superior Majistratura Judisiál  tenke foti desizaun ho onestu  traferensia no kualidade,  labele kahur interese, se ida ne’e maka kontinua nafatin, ha’u  hanoin katak  momentu ne’e  setór justisa hasoru obstákulu lubuk ida, halo oinsá para ultrapasa obstákulu ne’e  atu fila ona bá krediblidade  iha prosesu Konsellu Superior Majistratura Judisiál ne’e rasik,” Sergio Quintas informa ba jornalista sira iha Tribunál Judisiál Primeira Instánsia Díli, Tersa-ne-e.

Jurista ne´e esplika, transferénsia bá juíz husi Tribunál Judisiál Primeira Instánsia  bá  tribunál  seluk, ne’e la’ós kompeténsia tomak husi Konsellu Superior Majistratura, maibé tuir regra ne’e bainhira Konsellu atu deside atu halo transferénsia ruma tenke haré mós juíz sira nia atividade.

Bainhira  juíz sira halo servisu durante tinan  barak iha Tribunál ida, mak konsellu Superior Majistratura Judisiál hakarak halo transferénsia tenkehusu mós nia asetasaun ho diponibillidade, katak sei Juíz ne’e aseita maka foin halo transferénsia.

“Bainhira Juíz ne’ebé hetan transferénsia mak la aseita ho desizaun konsellu Superior Majistratura Judisiál ninian, bele  halo  reklamasaun bá iha konsellu Superior Majistratura Judisiál. No bainhira konsellu Superior Majistratura Judisiál deside  mantein nafatin desizaun ne’e, Juíz  sira bele halo rekursu kontisiozu, maibé tenke  kumpri lai deliblrasaun konsellu Superior Majistratura,” Sergio Quintas  tenik.

RAFA tenta konfirma Juíz Administradór Tribunál Judisiál Primeira Instánsia, Yudi Pamukas kona-bá distribuisaun servisu ne’e bá Juíz sira ne’e, maibé lakohi fó komentáriu.

Tuir lista rotasaun Juíz  ne’ebé RAFA asesa maka hanesan tuir maun ne’e; António José Fonseca Monteiro de Jesus, ne’ebé koloka iha Tribunal Judisiál  Primeira Instánsia Díli, mak juís ho antiguidade liu entre juís direitu na’in-neen hosi  segunda klase iha Timor-Leste,nia transfere ba Suai.

Ana Paula Fonseca Monteiro de Jesus, mós hosi Díli, mak juíza ho antiguidade liu entre juís direitu sira hosi terseira klase. Nia simu pose iha 2007 no transfere ba Oé-cuse, ne’ebé mak tribunál primeira instánsia iha área periférika liu entre tribunál haat.

Juís na’in-hitu seluk ne’ebé transfere mak José Gonçalves no Francisca Marques Cabral, rua hosi Díli, ne’ebé haruka respetivamente bá Suai no Baucau; Florência Freitas, Naasson Mário Armindo Marques Doutel Sarmento no Samuel da Costa Pacheco – ida ikus ne’e la inklui iha lista finál – entre Suai no Díli; Maria Modesta de Almeida Vieira no Sribuana da Costa, husi Baucau ba Díli, no Benjamin Barros.

Jornalista: Marcelino Tomae