Vítima Inséndiu Merkadu Taibesi Eziji Hasai Police Line Atu Sira Kontinua Negósiu

Kondisaun atuál iha Merkadu Taibesi hafoin inséndiu iha Sesta-kalan, foin lalais ne'e.

Díli, 29 Setembru 2026 (RAFA) – Vítima sira husi inséndiu iha Merkadu Taibesi, Díli, eziji Governu hasai police line atu fó espasu ba sira bele hamoos no kontinua atividade negosiu ba fatin refere.

Reprezetante vítima Orlando da Conceição ba RAFA iha merkadu Taibesi, Tersa-ne’e, hateten desde inséndiu akontese, ekipa Jestaun Merkadu Taibesi hamutuk ho Polísia Nasionál Timor-Leste (PNTL) tau police line hale’u área ne’ebé afetadu, atu ema labele tama ba fatin ne’ebé konsidera sei iha risku.

Negosiante ne’e dehan, to’o agora police line seidauk hasai, nune’e vítima sira seidauk bele tama no hamoos sira-nia fatin negósiu no mós seidauk simu apoiu ruma husi Governu.

Vítima sira eziji  bainhira  Governu seidauk bele fó apoiu imediatu, entaun police line ne’e bele hasai ona hodi fó oportunidade ba sira atu hamoos no hadi’a sira-nia fatin negósiu.

“Se merkadu ne’e mak la’ós governu mak tau, ne’e ami hadi’a tiha ona. La presiza ita-boot sira fó sasán ohin kedas. Maibé, mai atu dehan netik liafuan ruma katak ida-idak hadi’a nia fatin ba, hadi’a imi-nia sasán, hodi hein fali ajuda emerjensia iha loron ikus. Pelumenus tun mai ko’alia netik liafuan sira-ne’e mai ami,” Orlando da Conceição hateten.

Reprezentante vítima ne’e sente triste tanba konsidera Governu fó uluk apoiu emerjénsia ba vítima inséndiu iha Merkadu Comoro, ne’ebé akontese molok inséndiu iha Merkadu Taibesi.

“Tanbasá Merkadu Comoro ahi han ikus Governu fó apoiu urjente. Taibesi ne’e sala sa’ida karik. Ami fuan kanek, tanba Comoro ahi han ikus tiha hetan uluk apoiu emerjénsia,” tenik negosiante ne’e.

Orlando hatutan, to’o agora vítima sira seidauk bele kontinua fa’an sasán tanba área negósiu sei taka hela. Ne’e duni,  sira hein Governu atu fó despaisu ruma ne’ebé bele permite vítima sira hamoos no uza fali sira-nia fatin negósiu.

Xefe Jestor Merkadu Taibesi, Anibal de Jesus informa katak ekipa jestaun merkadu halo ona levantamentu dadus kona-bá vítima no prejuízu husi inséndiu, no submete ona ba Prezidente Autoridade Munisípiu Díli (PAM).

Nia fiar katak vítima sira sei hetan apoiu husi Governu iha tempu badak. Maibé, prosesu tenke tuir prosedimentu ne’ebé eziste.

“Buat hotu-hotu tenke tuir dalan hotu, ita tenke pasiénsia hodi hein, tanba sempre iha prosesu,” Anibal subliña.

Jestaun Merkadu seidauk bele fó autorizasaun ba vítima sira atu tama no hamoos sira-nia fatin negósiu tanba desizaun husi PAM Díli seidauk iha.

Anibal esplika katak sira hamutuk ho PNTL tau Police Line iha fatin akontesimentu tanba iha área akontesimentu ne’e sei iha sasán kroat no perigu ba ema, liuliu labarik sira ne’ebé bele tama sai ba área ne’e no kona sasán kroat, ne’ebé bele halo sira-nia ain kanek.

Tuir observasaun RAFA iha terenu hatudu katak vítima sira nafatin hein besik sira-nia fatin negósiu, hodi hein desizaun husi entidade relevante kona-bá bainhira sira bele tama hamoos no hadi’a fali sira-nia fatin atu bele kontinua sira-nia atividade negósiu.

Jornalista: Cesarina de Carvalho