PNTL Rejista Asidente Tráfegu Hamutuk 1.282 iha Teritoriu Nasionál

Komandante Polísia Tránzitu Seguransa Rodoviária Nasionál, Superintendente Xefe Polísia João da Costa.

Díli, 28 Setembru 2026 (RAFA)- Polísia Tránzitu Seguransa Rodoviária Nasionál, rejista  kazu asidente tráfegu hamutuk 1.282 iha territóriu nasionál hahú husi fulan-Janeiru to’o Agostu, tinan-ne´e.

Komandante Polísia Tránzitu Seguransa Rodoviária Nasionál, Superintendente Xefe Polísia João da Costa, ba RAFA, Segunda-ne’e, iha Díli, informa total númeru asidente ne´e,  ema na’in-84 lakon vida, enkuantu ema na’in-213 sofre kanek todan no vítima sira seluk hetan kanek kaman.

“Asidente hirak ne’e balun karreta ho karreta, motór ho karreta, motór ho motór, no balun mós asidente mesak, hanesan monu ba rai, soke ba ai ka soke ba fatuk. Rezulta husi asidente hirak ne’e halo ema kanek tohar no mate,”   Superintendente Xefe Polisia João da Costa hateten.

Superintendente Xefe Polisia João da Costa esplika asidente tráfegu hirak ne’ebé akontese  durante períodu ne’e iha fatores oioin ,inklui ema la kontrola velosidade, kondisaun estrada no kauza natureza.

Tuir relatóriu Polísia Tránzitu katak kazu asidente tráfegu ho númeru aas liu rejista iha Munisípiu Díli  tanba iha movimentu tráfegu ne’ebé barak liu kompara ho munisípiu sira seluk númeru asidente tráfegu ne’ebé rejista menus liu.

Polísia Tránzitu Seguransa Rodoviária Nasionál fó hanoin ba sidadaun hotu liu-liu sira ne’ebé utilija transporte hanesan karreta no motór  atu halo viajen ho kuidadu, respeita regra tráfegu no kontrola velosidade no nafatin tau atensaun atu bele hamenus risku no prevene asidente tráfegu.

Jornalista: João Carlos