PCIC ho SNI Detein Xinés Na’in-Rua Ho Droga Tipu Anfetamina no Metanfetamina

Prova droga ne'ebé PCIC ho SNI halo apreensaun husi suspeitu, Domingu 27 Setembru 2026.

Díli, 27 Setembru 2026 (RAFA) – Polísia Sientífika no Investigasaun Kriminál (PCIC-sigla portugés) ho Servisu Nasionál Intelijénsia (SNI), Domingu-ne’e, detein sidadaun  estranjeiru ho nasionalidade Xina na’in-rua iha área Manleuana no Bebonuk tanba suspeita ba kazu tráfiku ilísitu droga.

Informasaun ne’ebé RAFA sasesu husi Gabinete PCIC katak durante fulan ida nia laran, investigadór sira husi PCIC no SNI halo monitorizasaun ba suspeitu na’in-rua ne’e iha área Manleuana no Bebonuk, tanba deskonfia katak sira envolve iha atividade tráfiku ilísitu droga.

Operasaun ne’e hala’o ho métodu flagrante delitu, no PCIC konsege halo apreensaun  telemovel hamutuk lima, osan cash hamutuk US$14.900  no Rp.2.904.000 ne’ebé suspeita katak mai husi atividade fa’an droga, hamutuk ho mina metanfetamina 300 mililítu no metanfetamina kristál grama 9.

Droga tipu rua ne’e, deskreve hanesan forma baze livre hosi metanfetamina. Iha faze ida-ne’e, substánsia bele eziste iha forma líkidu oleozu no seidauk liu husi prosesu ligasaun ho ásidu, hanesan ásidu klorídiku, atu konverte ba forma masin-midar kolóridu ka forma kristálina, ne’ebé   koñesidu hanesan meth kristál.

Hafoin halo detensaun ba suspeitu na’in-rua ne’e, PCIC halo teste inisiál ba substánsia sira ne’ebé apreende durante operasaun no  rezultadu teste inisiál hatudu pozitivu bá substánsia droga anfetamina no metanfetamina.

PCIC mós halo teste urina ba suspeitu ida seluk ho rezultadu teste hatudu katak suspeitu ne’e konsume ona droga tipu ekstaze.

 Jornalista: Marcelino Tomae