Governu Inaugura Projetu Konstrusaun Bee-Moos Iha Laleia

Ministru MOP, Samuel Marçal inaugura bee-moos iha Postu Administrativu Laleia, Munisípiu Manatuto, Sábadu 26 Setembru 2026.

Manatuto, 26 Setembru 2026(RAFA)- Governu liu husi Ministru Obras Publika (MOP), Samuel Marçal,  Sekretáriu Estadu Eletrisidade Agua no Saneamentu  (SEEAS),  Santos Noronha ho Prezidente BTL,E.P,  Gustavo da Cruz, Sabádu-ne’e, inaugura projetu konstrusaun fornesimentu bee-moos iha Postu Administrativu Laleia, Munisípiu Manatuto.

Iha serimonia inaugurasaun ne’e, Ministru Obras Públika Samuel Marçal informa, Laleia mós hanesan Postu Administrativu ida ne’ebé maka iha tempu naruk komunidade sira susar atu asesu ba bee-moos. Ohin loron, ekipa Bee-Moos Timor-Leste, no mos SEAS bele responde ona, terus no susar sira ne’ebé maka iha tempu naruk nia laran sira infrenta.

Governu mós observa tan katak, saida maka komunidade sira  infrenta atu  presiza ajuda atu bele bele tulun resolve kondisaun moris  povu sira nian.

“La’ós mai atu haré deit bee, la’o iha dalan haré rai sira monu karik, valeta sira intupidu iha ne’ebé, eskola balu at karik, sentru saúde balu ladun diak, Vise-Ministru  no  dirijentes sira hotu mai para rona hotu komunidade sira nia preokupasaun,” n Ministru Samuel Marçal hateten.

Nia  mós husu ba autoridade lokal sira kontinua orienta komunidade atu hasa’e nafatin konsiensia  hodi halo pagamentu liu husi mediador eletrisidade atu bele monta kontadór eletrisidade no bee-moos ne’ebé maka governu instala ona. Nune’e osan sira ne’ebé maka iha bele halo fali manutensaun ba ekipamentu balu banhira avaria, no mos bele ajuda fila-fali iha fatin seluk ne’ebé maka presiza nafatin.

‘’Aldeia barak maka seidauk iha asesu ba bee presiza orsamentu duni, la’ós mai iha ne’e loke sampaña han no hemu deit lae, aproveita oportunidade ida ne’e para atu esplika ba povu no autoridade lokal sira,’’ Ministru Samuel Marçal hateten.

Governante ne’e mós apela ba komunidade Laleia sira labele tesi ai-horis arbiru, liu-liu ba ai sira ne’ebé maka bele halo kolesaun ba bee, atu nune’e,  bele fasil ba governu instala bee-moos iha rai maran sira.

Iha fatin hanesan Sekretáriu Estadu  Eletresidade Agua no Saneamentu, Santos Noronha  hateten bee maka hanesan objetu ba moris ema nian, balada sira, se iha fatin ruma maka la eziste bee-moos, sei la eziste mos moris.

Sekretariu Estadu ne’e afirma, dalaruma iha fatin balu ne’ebé halo perfurasaun hetan bee,  iha fatin balu ne’ebé lae no fontes bee seluk maka  bee-matan sira ne’ebé maka iha foho-lolon sira, ho nu’uné bee ne’ebé maka konsumu limite teb-tebes.  Tanba ne’e, presiza iha jestaun ne’ebé diak hodi jere rekursu bee  maka iha.

‘’Ba komunidade sira tenke hola papel iha laran,bainhira ita ko’alia kona-bá sustentabbilidade Bee mos, komunidade sira mos tenke iha konsiensia ona,labele sunu rai arbiru, talves  bee-matan ai sira ne’ebé maka fó moris babBee ne’e, ita sunu tiha. Entaun, bee ne’e sei la tahan, ai-ruma sei laiha nia sei sulin los deit ba tasi ne’e impaktu ida ne’ebé ita halakon rekursu bee ne’e’’ tenik Santos Noronha.

Sekretariu Estadu ne’e hatutan bee ne’ebé maka ema bele konsumu ne’e pursentu kiik tebes 0,03%, presiza entidade  hotu nia jestaun ne’ebé di’ak atu bele asegura nia sustentabilidade.

Prezidente BTL,E.P Gustavo da Cruz haktuir, fornesimentu bee-moos iha nivel Postu Administrativu Laleia ne’e oinsá maka atu halo komunidade sira iha Laleia atu bele sente Desenvolvimentu nasaun ida ne’e.

Governu investe ona orsamentu ba iha projetu ida ne’e, konsumidór sira maka tenke kuidadu sistema ne’ebé maka halo instalasaun ona,tanba iha postu administrativu lubuk ida maka kontinua hein governu nia intervensaun

‘’Hau fiar katak, ho kooperasaun komunidade, autoridade no veteranus sira,ita hamutuk para ita bele kore kiak ho mukit husi Bee ho Saneamentu iha ita nia nasaun ida ne’e,’’ Gustavo da Cruz subliña.

Tuir relatoriu ne’ebé maka Prezidente BTL,E.P  relata katak projetu sistema bee-moos iha Postu Administrativu Laleia fahe ba pakote tolu hanesan pakote primeiru konstrusaun sistema fornesimentu bee-moos ne’ebé implementa husi kompañia Reza Construction Lda, ho montante kontratu 565.203,55 USD.

Pakote  segundu Fornesimento no instalasaun Tanki Rezervatóriu (Liner Tank) ne’ebé implementa husi kompañia Glariato Unipessoal Lda ho montante kontratu 138.333,75 USD.

Pakote terseiru  Perfurasaun bee-moos ne’ebé implementa husi kompañia H2O Pump and Power ho montante kontratu 61.320,25 USD.

Jornalista Remigia Locatelli