TIMOR GAP ho PETROTIM RESOURCES Asina Akordu JOA Ba Bloku Petróleu TL-OT-25-24 Kobre Munisípiu Haat

TIMOR GAP, Empreza Públika, no PETROTIM RESOURCES, S.A., asina akordu Joint Operating Agreement (JOA) ba Production Sharing Contract (PSC TL-OT-25-24), Sesta 25 Setembru 2026.

Díli, 25 Setembru 2026 (RAFA)- TIMOR GAP, Empreza Públika, no PETROTIM RESOURCES, S.A., asina akordu Joint Operating Agreement (JOA) ba Production Sharing Contract (PSC TL-OT-25-24), hodi formaliza enkuadramentu operasaun entre parte rua no estabelese baze ba implementasaun PSC ne’e.

Tuir PSC ne’e, PETROTIM RESOURCES, S.A. iha interese partisipasaun 70% no hala’o papel hanesan operadór, enkuantu TIMORGAP iha interese partisipasaun 30%.

PSC TL-OT-25-24 kobre área sira ne’ebé lokaliza prinsipalmente iha Munisípiu Bobonaro no Ainaro, ho área adisionál sira ne’ebé estende ba Munisípiu Ermera, liuliu iha Atsabe, no mós ba parte balun husi Munisípiu Covalima.

Prezidente no CEO TIMOR GAP, E.P., Rui Maria Alves Soares hatete, TIMOR GAP sente orgullu ho PETROTIM RESOURCES ho nia ekipa ne’ebé iha tempu naruk hala’o servisu maka’ás kontinua fó persistensia halo negosiasaun ho ekipa TIMOR GAP atu ikus mai  iha tinan kotuk fulan-Novembru bele asina PSC ida ho TIMOR GAP.

“Viajen ida naruk uitoan mais ikus mai ita iha ona PSC no ohin ita mai iha ne’e atu selebra asinatura ba JOA ne’ebé sai hanesan enkuadramentu ida bele útiliza entre parseiru TIMOR GAP ho PetroTim iha Block B. Ne’ebé ha’u hanoin block ida ne’e halo ideia espesiál servisu lubuk ida ne’ebé hala’o ona iha pasadu husi Timor Gap no mós governu, estudu sira lubuk ida ne’ebé halo ona iha block ida ne’e, ita sai ona hanesan baze ka asaun ba iha servisu ne’ebé atu la’o ba oin,” hatete Prezidente no CEO TIMOR GAP, E.P. Rui Maria Alves Soares.

TIMOR GAP fiar katak, informasaun sira ne’ebé iha ona ba block B bele útiliza entre TIMOR GAP ne’ebé partisipasaun 30% hamutuk ho operadór PetroTim bele mellora servisu ida ne’e bele to’o ikus rezultadu ne’ebé iha bele kontribui ba dezenvolvimentu indústria petroleu iha Timor liu husi block ida ne’e.

“Ita espera katak ho asina JOA ida ne’e ita bele hakat pasu ida tan ba oin, bele implementa atividade sira ne’ebé nesesáriu hodi kontribui ba susesu atividade iha block Ba ne’ebé kobre área lubuk ida Bobonaro, Ermera-Atsabe, Ainaro uitoan parese, Suai ne’ebé área lubuk ida, husu depois ita hotu bele halo servisu ba komunidade sira ne’ebé kobre ba,” tenik nia.

Reprezentante husi empreza PETROTIM RESOURCES, S.A, Tim Lay hatete, JOA ne’e akordu ida importante ho TIMOR GAP tenke kompletu, tanba ne’e mós komponente ida importante ba ANMP nia rekezitu.

“Ami reforsa ami nia komitmentu kona-ba despeza ruma prosesu sira ne’e, ami tenke hatuur iha dekretu esplika ba ami nia relasaun akordu ne’e, depois programa ne’e ezekuta halo nusa, prosesu halo nusa depois hetan problema nusa, ita rezolve halo nusa kona-ba ambientál ne’e mós iha laran hotu, ne’e komponente barak liu,” hatete Tim Lay.

Nia informa, esplorasaun ne’e ba liu oliu ho gás no agora ne’e estudu kontinua lao hela no iha fulan-Outubru no Novembru, sei ba terenu halo vizita, halo mapamentu sira ne’e.

Durasaun estudu ne’e estimasaun tinan ida ba leten no hafoin estudu sei halo análize molok ba iha faze tuir mai.

Jornalista: Cristina Ximenes