DNTT Sei Aplika Koima Ba Transporte Publiku Ne’ebé La Para iha Halte

Halte ne'ebé governu estabelese iha Mandarin, Díli.

Díli, 24 Setembru 2026 (RAFA)- Diresaun Nasionál Transporte  no Terestre (DNTT) sei aplika Koima ka sansaun ba transporte públiku, liu-liu mikrolete ne´ebé la hatun pasajeru iha halte ne´ebé governu estabelese.

Diretór DNTT, Nelson Sequeira Martins hatete, ema barak mak lori sira nia karreta privadu ba para iha halte bainhira sei iha hela faze sosializasaun. Maibé depois halo sosializasaun, balun kontinua kumpri no balun halo infrasaun, nune´e ba oin DNTT sei rigor liután atu organiza movimentasaun Transporte sira ne´e hodi evita engrafamentu no asidente sira ne´ebé afeita ba ema nia vida umana.

“Ita agradese tanba ita nia komunidade barak mós komesa ba hein ona iha halte sira ne’e. Mezmu seidauk máximu maibé sira komesa ona, entaun ne’e di’ak ida ba futuru. Esforsu ne’ebé DNTT halo mak tenke sosializasaun bei-beik nune’e ita haree to’ok ba futuru sei iha modernizasaun transporte públiku ita sei maksimiza liu sosializasaun ba komunidade sira,” Diretór DNTT, Nelson Sequeira Martins hateten ba RAFA iha Díli, Kinta-ne’e.

DNTT mós husu ba pasajeru no utilizadór transporte públiku sira atu hein iha halte no motorista sira hatun paisajeiru sira mós tenke hatun iha Halte.

Nia esplika, se kontra regra normalmente uza artigu sira iha kodigu estrada no kontra ordem autoridade bele selu koima husi US$30.00 to’o haré ba gravidade infrasaun.

“Ita nia mehi to’o halte ne’e mós kompleta wifi, maibé haré mós orsamentu seidauk adekuadu, mais nei-neik ita sei to’o iha ne’eba. Importante mak ne’e ita husu ba komunidade hotu atu asegura fasilidade sira ne’e,” nia esplika.

Diretór ne´e esplika, fasilidade sira ne’e la’ós Minsiteriu Transporte Komunikasaun nian, fasilidade sira ne’e povu ninian, hodi povu nia osan, osan ne’ebé imi mai kontribui Diresaun Nasionál Transporte Terestre liu selu taxa osan sira ne’e mak útiliza fali hadia fasilidade tamba ne´e tenke ho konsiensia hodi utiliza ho responsabilidade tomak.

Jornalista: Cristina Ximenes