Komisaun C ho Ministériu Finansa Halo Diskusaun Ba Proposta Lei Rejime Jerál Taxa Administrativa

Komisaun C PN halo audiénsia ho Ministériu Finansa, Autoridade Atributaria, no Autoridade Aduaneiru  hodi halo diskuasaun ba proposta Lei nu. 29/VI(3a), kona-bá Rejime Jeral Taxa Administrativa, Kinta 24 Setembru 2026.

Díli, 24 Setembru 2026 (RAFA)- Komisaun C Parlamentu Nasionál ne´ebé trata Asuntu Finansa Públika, Kinta-ne’e, halo audiénsia ho Ministériu Finansa, Autoridade Atributaria, no Autoridade Aduaneiru  hodi halo diskuasaun ba proposta Lei nu. 29/VI(3a), kona-bá Rejime Jeral Taxa Administrativa antes Parlementu Nasionál halo aprovasaun ba lei referé.

Deputada Cedelizia Faria dos Santos, ba jornalista iha Parlamentu Nasionál hatete, objetivu husi audiénsia ne’e  ne’e mak komisaun C  hakarak atu rona  pareser husi Ministériu Finansa, Autoridade Atributaria, no Autoridade Aduaneiru antes halo aprovasaun ba lei referé.

Nia afirma durante ne’e lei Rejime Jeral Taxa Administrativa  seidauk ihatanba ne’e lei ida-ne’e mak sei sai baze,  tanba tuir  Konstituisaun RDTL  iha artigu 144 hatete katak atu halo koleta ba inpostu no taxa tenke liuhosi lei.

“Tuir loloos Ministériu Finansa tenke tau atensaun ba buat sira ne’e antes, selae ita halo koleta hela taxa ita hanesan la kumpri hela konstituisaun ne’ebé artigu  144 hatete. Maibé nafatin ami agradese ba IX Governu tanba ikus sira bele mai duni ho lei ida-ne’e para implementasaun iha tereñu ita labele viola tán konstituisaun, tanba taxa ho inpostu ne’e halai liubá ema nia diretu,” hatete Deputada Cedelizia Faria dos Santos

Fatin hanesan Vise Ministra Finansa Regina de Jesus de Sousa hatete, proposta lei id-ne’e mai husi nesesidade atu hametin moderniza sistema taxa administrativa iha Timor-Leste liuliu regra ne’ebé klaru uniforme no transparánsia, garante sistema juridiká ba sidadaun sira hotu.

“Ami fiar katak liuhosi dialogu konstrutivu entre Governu ho Parlamentu Nasionál ita bele hametin proposta lei ida-ne’e hodi proteje kreditu kontribuinte   hodi hametin direitu kontribuinte hametin responsabilidade administrasaun no garante interese públiku nian,” hatete Vise Ministra Finansa Regina de Jesus de Sousa.

Governante ne’e hatutan, projetu lei ida-ne’e la’ós atu aumenta taxa, maibé nia objetivu mak atu asegura katak bainhira estadu kria no kobra taxa nia tenke iha baze legál fundamentasaun pruporsionalidade igualdade no transparánsia.

Tuir ajenda Komisaun C  katak proposta lei ida-ne’e sei aprová iha Plenária Parlamentu Nasionál iha semana oin, antes tama ba debate Orsamentu Jeral Estadu (OJE) 2027.

Jornalista:  Zita Menezes