DNTT Konfirma Seidauk iha Lei Regula Transporte Online

Diretór DNTT, Nelson Sequeira Martins.

Díli, 24 Setembru 2026 (RAFA)- Diresaun Nasionál Transporte no Terrestre (DNTT), Kinta-ne’e, iha Díli,  konfirma, too agora seidauk iha lei atu regula transporte online sira tanba ne´e seidauk bele fó lisesnsa operasionál ba empreza Transporte Online ka Tron hodi halo operasaun no iha Timor-Leste.

Diretór DNTT, Nelson Sequeira Martins ba RAFA, esplika la’ós la fó lisensa ba empreza transporte online ka Tron, maibé iha hela prosesu nia laran tanba fulan hirak liubá iha kompaña hira mak submete pedidu mai iha Ministériu Transporte  no Komunikasaun no agora daudauk iha hela prosesu nia laran.

“Desde kedas tinan kotuk, Trona sira mai hato’o ona sira pedidu, mai halo aprejentasaun mai ami no ami haré, maibé nia prosesu ne’e sei la’o. Ita sei hein hela dekretu-lei ne’ebé elebora hela husi parte juridiku depois ita sei halo lansamentu ba públiku,” Diretór DNTT, Nelson Sequeira Martins hateten.

Diretór ne´e hatutan katak parte juridiku no tenkniku sira elabora hela dekretu lei ne’e molok lori ba Konsellu Ministru, maibé sei mós rona opiniaun husi parte relevante sira, bainhira halo trial ne’e, keta hetan iha dezafiu ruma sei akomoda hotu atu hamosu dekretu lei ida bele fó benefisiu ba parte hotu-hotu.

Dadus ne’ebé DNTT rejista iha pedidu huisi kompaña haat mak submeter ba Minsiteriu Transporte no Komunikasaun.

Husi parte seluk, Direitór Tron, João Amaral hatete, Tron nia funsaun atu konekta ema sira ne’ebé iha transporte no ema sira ne’ebé presiza transporte hanesan motór no karreta.

Nia esplika Tron mós bele fasilita kliente sira halo delivery ba sasan, hahan iha restaurante, ema sira ne’ebé presiza sosa sasan iha loja, ema sira ne’ebé presiza hadia AC, listrik, hamoos uma laran inklui order online sira.

Nia afirma, iha plataforma online ne’e hakarak servisu hotu-hotu iha aplikasaun ida de’it, nune’e fasilita ema nia servisu ka atividade loro-loron ne’e ho lalais, seguru no fasil.

“Prosesu rejistu iha DNTT durante ne’e ita ba follow-up hela no prosesu ne’e tinan kotuk kedas ita ba aprejenta ona iha Minsiteriu Transporte no Komunikasaun liu husi asesor sira. Ita aprejenta mós ba iha Direitór DNTT. Ita husu mós oinsá ita bele la’o tuir dalan legál nian. Entaun husi tinan kotuk depois Tron aprejenta, parte ministériu mós sira prepara ona lei atu regula kona-bá transporte online, tanba durante ne’e ita nia lei seidauk iha,”  Direitór Tron, João Amaral hateten.

Jerente ba Empreza Tron konfensa mós katak, durante ne’e iha komunikasaun di’ak ho DNTT, ho transporte sira, Tron halo soft launching foin lalais ne’e hodi halo koñesimentu ba kliente sira  no kontinua hein lisensa liu husi dekretu lei ne´ebé iha.

Nia informa, ho Tron, tarefa ba motór mínimu ne’e $1.00 kada kilometru, Karreta mínimu ne’e $2.00 ba dois kilometru primeiru, kada killometru tuir mai ne’e sei aumenta signifika tarefa ne’e sura bazeia ba kilometrazen no tarefa ne’e transparente no fixsu.

Jornalista: Cristina Ximenes