FONGTIL husu Komisáriu Rui Pereira Hapara Paulo Gomes husi Kargu Asesór Internasionál iha CAC

Diretór Ezekutivu FONGTIL, Inocêncio de Jesus Xavier.

Díli, 24 Setembru 2026 (RAFA)– Forum Organizasaun Noun Governamentál Timor-Leste (FONGTIL), duvida ho integridade Komisaun Anti-Korupsaun (CAC) iha kombate korrupsaun hafoin mosu iregularidade iha kontratasaun ba asesor internasionál Paulo Gomes ne’ebé alegamente ba krime falsifikasaun dokumentu no koasaun iha kazu doping iha siklismu iha Portugal.

Diretór Ezekutivu FONGTIL, Inocêncio de Jesus Xavier, bá RAFA iha Díli, Kinta-ne’e, hatete FONGTIL respeita prezunsaun inosénsia, maibé se ema ne’e, komete krime, labele admite hodi servisu iha área korrupsaun,  tanba ne’e nia  ejize Komisáriu CAC Rui Pereira dos Santos atu hapara emidiata  Paulo Alexandre Gomes husi kargu Asesór internasionál iha CAC  nian.

“Ida-ne’e problema boot bá CAC, tanba funsionariu baibain iha Timor, tenke iha karta bom komportamentu,  agora butamak ida simu  osan boot, iha ita nia  rai, ne’e Integridade CAC nian ne’e ami mós kestion. No husu bá CAC atu halo averiguasaun bá dadus hotu-hotu, husi asesór refere, atu hapara emidiata. FONGTIL  haree katak Asesór ne’e, durante ne’e la ajuda CAC hodi jere ninia servisu ho di’ak,” hatete Inocêncio de Jesus Xavier.

Nia afirma, CAC tenke halo komunikasaun ho autoridade sira husi Portugál, tanba alegasaun ne’e iha lukus,  tanba  akuzadu iha Portugál, maibé  autór servisu fali iha fatin  seluk.

Nia  subliña, sei CAC  kontrata Asesór internasionál, bazeia bá akordu vilateral sira ema liu-husi  autoridade kompetente sira iha Portugál bele prosesa Estadu Timor.

Iha Kuarta, foin lalais ne’e, RAFA konfirma Komisáriu Komisaun Anti-Korrupsaun (CAC) Rui Pereira dos Santos, maibé rejieita fó komentáriu kona-bá asessór internasionál iha Komisaun Anti Korrupsaun (CAC), Paulo Alexandre Gomes ne’ebé alegamente ba krime falsifikasaun dokumentu no koasaun iha kazu doping iha siklismu iha Portugal.

Inspetór-xefe Polísia Judisiária (PJ) Portugesa ida, ne’ebé akuzadu ho krime falsifikasaun dokumentu no koasaun iha kazu doping iha siklismu, hetan lisensa sein saláriu husi diresaun nasionál PJ atu servisu nu’udar asessór iha Komisaun Anti-Korrupsaun Timor-Leste.

Reportajen investigativu husi CNN Portugal relata katak inspetór Paulo Alexandre da Silva Gomes hetan autorizasaun ne’e depois nia manán konkursa bá kargu asessór iha   Komisaun Anti Korrupsaun Timor-Leste.

Paulo Alexandre Gomes Gomes, ne’ebé  to’o  iha 2023 servisu iha Diretoria  Norte  bá PJ, alegadamente partisipa iha planu ida ho emprezáriu Adriano de Sousa, ne’ebé koñesidu ho naran “Quintanilha” no iha tempu ne’ebá sai prezidente klube siklismu W52-FC Porto.

Jornalista: Marcelino Tomae