Fulan Oin, INETL Lansa Relatóriu Pobreza Timor-Leste 2024

Prezidente Institutu Nasionál Estatístika Timor-Leste, Institutu Públiku (INETL.IP), Elias dos Santos Ferreira. Imajen/INETL

Díli, 23 Setembru 2026 (RAFA) — Institutu Nasionál Estatístika Timor-Leste, Institutu Públiku (INETL, I.P.) fulan oin sei lansa relatóriu kona-bá taxa no karaterístika pobreza iha Timor-Leste tinan 2024.

Prezidente INETL, Elias dos Santos Ferreira, hatete relatóriu final kona-bá pobreza no peskiza padraun moris Timor-Leste 2024 remata ona no aprezenta ona ba Konsellu Ministru sei lansa ba publika iha fulan oin.

“Relatóriu final ona no aprezenta tiha ona iha Konsellu Ministrus, no fulan oin ita sei lansa, nune’e ema hotu-hotu bele asesu,” Elias dos Santos Ferreira informa ba jornalista, sira iha Salaun Koffi Anna, Díli, Kuarta-ne’e.

Nia esplika katak rezultadu peskiza nian hatudu taxa pobreza nasional iha Timor-Leste iha 2024 atinji 37%, bainhira uza liña pobreza nasional nu’udar referénsia ba medisaun.

Dadus ne’e bazeia ba peskisa ne’ebé hala’o ba uma-kain sira iha territóriu tomak, ho amostra besik uma-kain 7.500. Peskisa ne’e nia objetivu atu hatene kondisaun moris no situasaun pobreza iha populasaun.

Elias Ferreira hatutan rezultadu Peskisa Padraun Moris 2024 sei permite halo komparasaun ho dadus peskisa sira uluk, inklui rezultadu tinan 2014.

Nia subliña katak dadus kona-ba pobreza importante tanba durante tinan sira liubá, estimasaun pobreza iha Timor-Leste dala barak uza dadus no estimasaun husi Banku Mundiál.

Nia mós relata katak taxa pobreza 37% ne’e uza liña pobreza nasional, la’ós liña pobreza internasionál. Tanba ne’e, interpretasaun kona-ba dadus tenke konsidera métodu no liña pobreza ne’ebé uza iha peskiza.

“Relatóriu ne’e sei publika ho informasaun detalhadu kona-ba rezultadu peskiza, atu permite Governu, instituisaun públika, sosiedade sivíl, jornalista no públiku komprende di’ak liután situasaun pobreza iha Timor-Leste,” Elias Ferreira afirma

INETL planeia mós konvida Banku Mundiál, parseiru dezenvolvimentu, sosiedade sivíl no jornalista sira atu partisipa iha eventu publikasaun relatóriu ne’e. Eventu ne’e sei aborda mós kona-ba metodolojia peskiza no oinsá atu interpreta dadus pobreza 2024.

Prezidente INETL konsidera publikasaun dadus ne’e importante nu’udar baze ba Governu no instituisaun relevante sira atu halo planeamentu, dezenvolve polítika públika no determina programa sira ne’ebé responde ba nesesidade populasaun.

Reuniaun Konsellu Ministru  iha loron 16 fulan-Setembru, tinan ne’e, Governu aprova ona publikasaun relatóriu sumáriu kona-bá pobreza iha Timor-Leste, ne’ebé aprezenta husi Vise-Ministra Finansas, Regina de Jesus.

Relatóriu ne’e elabora bazeia ba rezultadu inkéritu kona-ba Kondisaun Moris iha Timor-Leste 2024 (TLSLS 2024), hodi aprezenta dadus atualizadu kona-ba insidénsia no karakterístika pobreza iha nasaun.

Rezultadu hatudu katak taxa pobreza nasional tun husi 41,8% iha 2014 ba 37% iha 2024, signifika redusaun 4,8 pontu persentajen durante dékada ikus.

Maski iha redusaun iha nivel nasional, pobreza sei aas liután iha área rurál. Dadus hatudu taxa pobreza iha área rurál atinji 45,5%, kompara ho 18,4% iha área urbana.Diferensa mós eziste entre munisípiu sira.

Hafoin publikasaun relatóriu sumáriu, INETL, I.P. no Ministériu Finansas, ho apoiu husi Banku Mundiál, sei dezenvolve Avaliasaun Pobreza no Ekuidade bazeia ba dadus TLSLS 2024.

Avaliasaun ne’e sei foka ba análize kle’an kona-ba fatór sira ne’ebé kontribui ba redusaun pobreza no sei apoia formulasaun polítika públika bazeia ba evidénsia, ho objetivu atu promove kresimentu ekonómiku ne’ebé inkluzivu no reziliente.

Governu antes mós hatete katak estimasaun taxa pobreza 71,% ne’ebé atribuída ba Banku Mundiál la’ós númeru ne’ebé Governu uza nu’udar taxa pobreza nasional atual, tanba iha diferensa entre métodu no liña pobreza ne’ebé uza.

Ho publikasaun relatóriu kompletu iha fulan oin, INETL sei fó oportunidade ba públiku atu asesu diretamente ba dadus, metodolojia no análize kona-ba situasaun pobreza iha Timor-Leste.

Jornalista : Remigia Locatelli