Ezekusaun OJE 2026 iha Trimestre Daruak Atinje 36%

Prezidente Komisaun F PN, Maria Gorumali Barreto.

Díli, 23 Setembru 2026 (RAFA)- Prezidente Komisaun F Parlamentu Nasionál (PN) ne´ebé trata asuntu Saúde, Igualdade Jeñeru no Seguransa Sosiál, Deputada Maria Gorumali Barreto, Kuarta-ne’e, hatete ezekusaun Orsamentu Jerál Estadu 2026 iha trimestre daruak atinje 36%.

“Despaxu sira ne’ebé mai iha Komisaun F, ami tau prioridade katak relatóriu ezekusaun orsamentál Governu iha trimestre daruak nia importante tebes, para bele halo diskusaun.  Husi diskusaun orsamentu ne’ebé mak iha ami haré katak enjerál husi OJE 2026 ninian bazeia ba relatóriu iha segundu trimestre katak nia ezekusaun foin ba iha 36%,” Deputada Maria Gorumali Barreto informa.

Nia haktuir liga ba ministériu relevante hotu  ne’ebé tutela iha Komisaun F  mak hanesan Ministériu Saúde (MS) ho nia instituisaun autonomia sira, Ministériu Asuntu Kombatente no Libertasaun Nasionál (MACLN), Ministériu Solidariedade no Inkluzaun (MSSI) no nia instituisaun autonomia sira nomós Sekretáriu Estadu Iguladade (SEI)  tuir komisaun F nia haré Ministériu balu ezekusaun di’ak no Ministériu balu mak  ezekusaun sei kiik.

“Iha ministériu balu mak nia ezekusaun mais altu ne’ebé bazeia ba tempu ezekusaun nian, maibé

iha mós Ministériu balu ne’ebé mak nia ezekusaun inferior ka sei ki’ik ida ne’e mak ami presiza atu relata iha ne’e,” tenik nia.

Reprezentante povu ne´e husu liña ministériu sira ne’ebé mak ezekusaun sei ki’ik, iha  trimestre da-tolu no trimestre da-haat ezekusaun  orsamentu  jeral estadu 2026 bele iha mudansa no lori benefisiu ba povu.

Iha aprovasaun relatóriu ne’e, Deputadu sira komisaun F aprova ho votu a-favór neen, kontra zero, no abstensaun rua.

Jornalista : Zita Menezes