Komisaun A Halo Audénsia ho KSMJ Kona-bá Alterasaun Ba Organika Kámara Kontas no Tribunál Superior Administrativu Fiskál

Komisaun A PN halo audénsia ho Konsellu Superiór Majistratura Judisiál, Kuarta 23 Setembru 2026.

Díli, 23 Setembru 2026 (RAFA)- Komisaun A Parlamentu Nasionál (PN) ne´ebé trata Asuntu Konstituisaun no Justisa, Kuarta-ne’e,  halo audiénsia públika ho Konsellu Superiór Majistratura Judisiál hodi halo diskusaun kona-bá projetu lei Nu. 18/VI (3a), terseira alterasaun lei nú. 9/20211, 17 Agostu, aprova organika kamara Kontas Tribunál Superior Administrativu Fiskál Kontas.

Prezidente Komisaun A, Natalino dos Santos, infroma  objetivu husi komisaun A halo audiénsia públika ho Konsellu Superior Majistratura Judisiál, kona-bá lei kamára kontas iha terseiru alterasaun ne’e atu rona parasér no opiniaun husi Konsellu Superior Majistratura Judisiál, antes ba halo debate jeneralidade no espesialidade hodi aprová iha plenária Parlamentu Nasionál.

“Inisiativa mai husi Deputadu sira husi Bankada CNRT, PD no KHUNTO, entaun komisaun A ohin halo audiénsia ho Konsellu Majistratura Judisiál, ho prezidente hanesan kualidade kamára kontas tribunál administrative fiskál ho auditória sira, atu rona sira nia hanoin kona-bá terseira alterasaun ne’ebé  Deputadu sira projeta iha projetu lei ne’e,” hatete Deputadu Natalino dos Santos.

Fatin hanesan Prezidente Tribunál Rekursu (PTR), Afonso Carmona  hatete,  altersaun lei ida-ne’e atu ajuda oinsá ezekusaun orsamentu jeral estadu (OJE) bele la’o di’ak liután, no bele halo mudansa karik iha lei antes ne’e difikulta ezekusaun orsamentu jerál estadu (OJE).

“Atu fó pareser de’it, iha ne’ebá ha’u la ko’alia barak tanba projetu lei iha tiha ona, ha’u só dehan de’it katak karik Parlamentu ida-ne’e  aprová duni lei ida-ne’e tribunál superior administrativa kontas halo de’it nia servisu kumpri lei,” PTR Afonso Carmona hateten.

Afonso Carmona subliña Parlamentu Nasionál halo alterasaun ba lei ne’e la’ós atu prezudiká estadu, maibé oinsá lei ne’e bele kontrola irregularidade  gastu orsamentu jeral estadu (OJE), hodi bele fó  impaktu pozitivu ba povu no nasaun.

Jornalista : Zita Menezes