Komisáriu CAC Rejeita Fó Komentáriu Ba Alegasaun Asesór Paulo Gomes Ba Krime Falsifikasaun Dokumentu no Koasaun iha Kazu Doping

Komisáriu CAC, Rui Pereira dos Santos.

Díli, 23 Setembru 2026 (RAFA)–  Komisáriu Komisaun Anti-Korrupsaun (CAC) Rui Pereira dos Santos, rejieita fó komentáriu  kona-bá asessór internasionál iha Komisaun Anti Korrupsaun (CAC),  Paulo Alexandre Gomes ne’ebé  alegamente ba krime falsifikasaun dokumentu no koasaun iha kazu doping iha siklismu iha Portugal.  Tuir reportajen investigative CNN Portugés.

Notísia Relevante: Inspetór Portugés Akuzadu Integra iha CAC Timor-Leste ho Lisensa husi PJ

Iha Kuarta-ne’e RAFA tenta atu halo konfirmasaun  ho Komisáriu CAC, Rui Pereira dos Santos, maibé lakohi fó komentáriu, no informa de’it katak Asessór Paulo Alexandre Gomes ne’e,  CAC kontrata liuhusi konkursu públiku.

“Ha’u lakohi fó komentáriu bá ida-ne’e,  buat seluk imi bele husu, Malae  Portugál sira nia iha Timor ne’e sira halo grupu atu hatún malu,  tanba rekrutamentu ne’e prosesu iha juri sira, ema ne’e nia bom komportamentu iha hotu,” Komisáriu Rui Pereira dos Santos hateten.

Bainhira RAFA tenta kontinua husu, Komisáriu Rui  Pereira dos Santos, rejeita katak nia la fiar informasaun ka dokumentu ne’ebé iha no konsidera nu’udar falsu kona-bá Asesór Paulo Alexandre Gomes ho nacionalidade Portugal, ne’ebé alegadamente envolve iha akuzasaun krime falsifikasaun dokumentu no koasaun iha kazu doping iha modalidade siklismu.

Komisáriu CAC, Rui Pereira dos Santos, afirma katak Paulo Alexandre Gomes hetan pozisaun Asesór iha CAC tuir prosesu konkursu no bazeia bá meritu, tanba  ne’e preokupasaun kona-bá nomeasaun asesór ne’e antes ne’e klarifika ona, liu-liu kona-bá prosesu kontratasaun.

Nia dehan se imi ko’alia kona-bá publikasaun iha RAFA, Komisáriu la atende ida, tanba Komisáriu esklares ona kona-bá preokupasaun ne’e, liuliu kona-bá CAC nia kontratasaun asesór ne’e. Nia foin kandidatu, no ida ne’e mak sira kestiona. Sira hakarak hatama sira nia ema.

Komisáriu ne´e argumenta katak, sé Paulo Alexandre Gomes,  envolve duni iha krime ruma, tantu iha Portugal ka iha nasaun seluk, informasaun ka dokumentu ofisiál kona-bá kazu ne’e bele entrega ba Komisáriu atu halo verifikasaun.

Nia afirma, sé Asesór Paulo Alexandre Gomes envolve iha krime ruma, Komisáriu  hapara ona nia servisu, tantu iha nível internasionál no nasionál. Maibé to’o agora, laiha e-mail ruma husi Portugal ne’ebé to’o mai Komisáriu kona-bà asuntu ne’e.

“Ne’e imi rona tutan de’it informasaun ne’e. Komisáriu sei la atende imi nia kestaun kona-bá ami nia asesór ne’e. Husik nia halo servisu,” Komisáriu Rui Pereira dos Santos afirma.

Kona-bá akuzasaun bá akuzadu ho krime falsifikasaun dokumentu no koasaun iha kazu doping iha siklismu, bá Komisáriu  Rui la tau iha kestaun, tanba  Paulo Alexandre Gomes, ne’e tuir konkursu meritu.

“Lae  ano, ó lalika mai kestiona fali kona-bá ida-ne’e, tanba  informasaun ne’e Komisáriu la fiar ona, tanba malae Portugeza  sira mai iha ne’e, iha sindikatu,” Komisáriu CAC  hatan ba RAFA.

Komisáriu  afirma, agora  média rona  tutan de’it imformasaun ne’e, tanba ne’e Komisáriu sei la atende  RAFA  kona-bá  Asessór  ne’e , husik nia hala’o servisu.

Inspetór-xefe Polísia Judisiária (PJ) Portugesa ida, ne’ebé akuzadu ho krime falsifikasaun dokumentu no koasaun iha kazu doping iha siklismu, hetan lisensa sein saláriu husi diresaun nasionál PJ atu servisu nu’udar asessór iha Komisaun Anti-Korrupsaun Timor-Leste.

Reportajen investigativu CNN Portugal relata katak inspetór Paulo Alexandre Gomes hetan autorizasaun ne’e depois nia manán konkursa bá kargu asessór iha   Komisaun Anti Korrupsaun Timor-Leste.

Paulo Alexandre Gomes, ne’ebé to’o iha 2023 servisu iha Diretoria Norte bá PJ, alegadamente partisipa iha planu ida ho emprezáriu Adriano de Sousa, ne’ebé koñesidu ho naran “Quintanilha” no iha tempu ne’ebá sai prezidente klube siklismu W52-FC Porto.

Jornalista: Marcelino Tomae