Inspetór Portugés Akuzadu Integra iha CAC Timor-Leste ho Lisensa husi PJ

Díli, 22 Setembru 2026 (RAFA) – Inspetór-xefe Polícia Judiciária (PJ) Portugesa ida, ne’ebé akuzadu ho krime falsifikasaun dokumentu no koasaun iha kazu doping iha siklismu, hetan lisensa sem saláriu husi dirasaun nasionál PJ atu servisu nu’udar asessór iha Komisaun  Anti-Korrupsaun Timor-Leste.

CNN Portugal relata katak inspetór Paulo Alexandre da Silva Gomes hetan autorizasaun ne’e depois nia manán konkursa ba kargu asessór iha CAC.

Gomes, ne’ebé to’o 2023 servisu iha Diretoria do Norte da PJ, alegadamente partisipa iha planu ida ho emprezáriu Adriano de Sousa, ne’ebé koñesidu ho naran “Quintanilha” no iha tempu ne’ebá sai prezidente klube siklismu W52-FC Porto.

Tuir investigasaun CNN Portugal, planu ne’e iha objetivu atu evita investigasaun kona-bá doping iha ekipa siklismu ne’e atu to’o ba dirijente klube nian.

Despaxu akuzasaun Ministériu Públiku (MP) Porto, datadu 27 Fevereiru 2025, akuzadu Gomes no Sousa ho koautoria iha krime falsifikasaun dokumentu no koasaun, hamutuk ho klube W52-FC Porto.

Tuir dokumentu ne’e, arguidu na’in-rua kria “Código de Conduta e Políticas de Compliance” ho data retroativu atu hatudu katak Sousa no klube la hatene kona-bá prátika sira ne’ebé iha investigasaun.

Akuzasaun ne’e prepara husi prokuradór Catarina de Azevedo no Marta Soares, husi 1.ª Seção do Departamento de Investigação e Ação Penal (DIAP) Porto.

Prosesu disiplínár

CNN Portugal relata katak dirasaun nasionál PJ, ne’ebé iha tempu ne’ebá lidera husi Luís Neves, loke prosesu disiplínár hasoru Gomes iha 2022. Maibé, to’o agora, laiha informasaun públika kona-bá rezultadu husi prosesu disiplínár ne’e.

Iha 2023, Gomes transfere ba Diretoria da PJ Açores. Iha 2024, nia remata kursu formasaun ba inspetór-xefe no, iha 3 Abril 2025, nia promosaun publika iha Diário da República.

Promosaun ne’e akontese depois MP Portugés publika ona akuzasaun hasoru nia.

Iha Agostu 2026, dirasaun atual PJ, lidera husi Carlos Cabreiro, fó lisensa sem saláriu ba Gomes atu servisu iha CAC Timor-Leste.

CAC mak instituisaun independente ne’ebé iha responsabilidade atu prevene no investiga krime korrupsaun, peculatu, abuzu podér no tráfiku influénsia iha Timor-Leste.

Iha 2 Jullu 2026, CAC publika iha nia pájina ofisiál Facebook katak Gomes sai kandidatu ho rezultadu aas liu entre kandidatu na’in-tolu.

Prosesu selesaun inklui análize kuríkulu no entrevista, tuir despaxu ne’ebé asina husi komisáriu interinu CAC, Miguel Acácio Faria.

PJ Portugál invoka prezunsaun inosénsia

CNN Portugal husu dirasaun nasionál PJ kona-bá prosesu disiplínár hasoru Gomes, maibé instituisaun ne’e lakohi konfirma ka fó komentáriu kona-bá kazu espesífiku.

PJ Portugál invoka “prinsípiu prezunsaun inosénsia”, no hatete katak ezisténsia akuzasaun ka prosesu disiplínár ne’ebé seidauk remata labele konsidera hanesan desizaun finál kona-bá responsabilidade.

Kona-bá promosaun no atribuisaun kargu internasionál ba Gomes enkuantu nia hein julgamentu, PJ hatete katak partisipasaun traballadór ida iha prosesu judisiál ka disiplínár la determina, mesak, nia eskluzaun automátika husi prosesu promosaun ka mekanizmu legál sira seluk.

Diresaun PJ mos asegura katak nia atua “iha kumprimentu estritu ba lei”, no konsidera interese servisu no garantias prosesuál ba traballadór sira.

Paulo Gomes lakohi fó komentáriu ba CNN Portugal, ho razaun katak prosesu judisiál ne’e “la’o hela”.

Alegada ligasaun ho dirijente W52

Tuir CNN Portugal, ligasaun entre Gomes no Adriano de Sousa sai públiku iha 2022, depois informadór ida alerta PJ Porto kona-bá prezensa alegadu “agente infiltradu” ne’ebé proteje Sousa.

Tuir reportagem ne’e, Sousa aprezenta Gomes ba nia kolaborador sira ho naran “Paulo” no hatete katak nia mekaniku ciclismu.

Maibé, prezensa Gomes hamosu deskonfiansa tanba nia uza termu tékniku sira ne’ebé konsidera apropriadu liu ba ema ne’ebé iha koñesimentu kona-ba área jurídika.

Fotografia ida ne’ebé hasai iha instalasaun fábrika W52, iha Felgueiras, ajuda identifika ema ne’e hanesan inspetór Paulo Gomes.

Tuir despaxu akuzasaun ne’ebé CNN Portugal sita, Gomes alegadamente simu responsabilidade atu entrega “Código de Conduta” ba diretor desportivu Nuno Ribeiro atu asina.

Ribeiro iha tempu ne’ebá sujeitu ba medida koasaun ne’ebé bandu nia atu kontaktu diretamente ho Sousa. Dokumentu ne’e depois asina mos husi ciclista balu iha ekipa.

Tuir akuzasaun, Sousa alegadamente halo presáun ba atleta sira atu asina dokumentu ne’e, inklui ameasa ba atleta ida katak, se nia la asina, nia sei lakon saláriu. remata