MJDAC ho FTTL Haforsa Kapasidade Treinadór no Atleta Poomsae

Fromasaun ba atela taekwondo sira, Segunda 21 Setembru 2026.

Díli, 21 Setembru 2026 (RAFA) –Ministeriu Juventude, Desportu, Arte no Kultura (MJDAC) ho Federasaun Taekwondo Timor-Leste (FTTL), Segunda ne’e, fasilita formasaun hodi haforsa kapasidade treinadór no atleta Poomsae.

Atleta sira ne’ebe partisipa iha formasaun  hamutuk  na’in-21; mane na’in-18 no feto na’in-tolu, ho objetivu hasa’e abilidade iha aspetu tékniku ba modalidade Taekwondo.

Ministru Juventude, Desportu, Arte no Kultura, Nelio Isaac Sarmento, informa katak formasaun ne’e sei hasa’e kapasidade atleta Poomsae, inklui hametin kooperasaun Timor-Leste ho Governu Koreia ba dezenvolvementu rekursu umanu iha modalidade Taekwondo.

“Hau espera katak ho formasasun baziku ida ne’e, fó oportunidade ba dozan sira, atu aumenta sira nia atleta ho numeru espesiál  poomse nia. Nune’e, mós fó oportunidades  ba Governu atu iha kooperasaun entre  Governu ho Governu Koreia oinsá bele ajuda liután Timor iha rekursu umanu  ba atleta sira poomse nian, ” Ministru Nelio Isaac hateten ba jornalista sira.

Sekretáriu Jerál FTTL, José Magno, afirma katak formasaun ne’e sai baze atu hasa’e kapasidade treinadór no atleta Poomsae, haburas talentu foun ba nivel internasionál.

“Ha’u hanoin ba formasaun ba loron ohin importente, ne’ebé mak organiza husi Ministeriu Juventude Desportu hamutuk ho federasaun taedwondo Timor Leste, para bele aumenta kapasidade tekniku kapasidade ba ita nia treinador poomse sira hodi nune’e sira bele iha koñesementu diak hodi halo preparasaun atleta sira ba futuru,” José Magno hatete.

Formasaun treinadór Taekwondo Timor-Leste hala’o iha salaun Ministeriu Juventude, Desportu, Arte no Kultura durante loron lima ho partisipante hamutuk na’in-rua.

Jornalista : Marito da Costa / David Gonçalves