KHUNTO Husu Governu Hasa’e Saláriu Minimu Ba US$250

Deputadu Luis Roberto.

Díli, 21 Setembru 2026 (RAFA)- Membru Parlamentu Nasionál husi Bankada Kmanek Haburas Unidade Nasionál Timoroan (KHUNTO), Luis Roberto, husu Governu halo altersaun ba lei saláriu minimu US$115 ba too iha US$250 hodi refleta ho kondisaun globál ne´ebé afeta mós ba nesesidade baziku sira sae maka’ás.

Reprezentante povu ne´e hateten, saláriu minimu ne’e preokupasaun  Parlamentu Nasionál nian inklui públiku sira mós sempre preokupa, tanba daudaun ne’e  presu nesesidade baziká  sira iha merkadu  folin sa’e hotu tanba ne’e tenke hasa’e saláriu minimu  US$200 to’o US$250.

“Ne’ebé kuandu saláriu minimú US$115 to’o US$120  ida-ne’e la nesesariu, ita bele dehan katak labele responde nesesidade bazikú populasaun sira-nian,” Deputadu Luis Roberto informa ba jornalista sira iha Parlamentu Nasionál, Segunda-ne´e.

Membru Parlamentu Nasionál ne’e haktuir ko’alia kona-bá  hasa’e saláriu minimu ne’e hahú kedan husi VIII Governu, tanba ne’e nia parte husu IX Governu nia responsabilidade atu bele rezolve problema saláriu minimu iha Timor-Leste.

Hatan ba kestaun ne´e, Vise-Ministru Asuntu Parlamentár Adérito Hugo da Costa hateten, to’o agora daudaun iha reuniaun Konsellu-Ministru, ministériu relevante seidauk aprezenta  lejislasaun ruma kona-bá saláriu minimu.

“Ministériu kompetente ne’e bele aprezenta ona, depois ami sei aprezenta  fó sai ba públiku, kuandu seidauk to’o iha meza Prezidénsia Konsellu-Ministru nian, ami sei la halo pronúnsia ruma, espera katak kolega sira responsavél ba ida-ne’e bele tau atensaun,” Vise-Ministru Asuntu Parlamentár Adérito Hugo hateten.

Antes ne´e, Sindikatu Traballadór Timor-Leste (KSTL) mós ezije ba Governu atu hasa’e saláriu minimu husi US$200 to’o US$250 tuir kondisaun moris no situasaun real ne´ebé iha.

 Jornalista : Zita Menezes