AD Estrela Baguia Konkista Vitória Fantástiku Hasoru AS Jerman ho Score 14-1

Ekipa AD Estrela Baguia.

Díli, 19 Setembru 2026 (RAFA)- Ekipa promovidu AD Estrela Baguia hatudu dominasaun boot iha jornada daruak Liga Futsal Timor-Leste, hafoin halakon nia adversáriu AS Jerman ho score 14-1, iha jogu ne’ebé hala’o iha Kampu Futsal F-FDTL, Fatuhada, Dili, Sábadu-ne’e.

Iha inísiu jogu primeira parte, AD Estrela Baguia ne’ebé mak reforsa husi jogadór esperiente sira hanesan Ruben Faria, Bendito Ramos,  Agy Lay no Zaquiel Sanches kombina ho jogadór estranjeiru balu haúu ho ritmu ofensivu no konsege hatama golu haat ba baliza AS Jerman.

Golu dahuluk Estrela Baguia marka hosi kapitaun ekipa Zaquiel Sanches iha minutu rua antes Bendito Ramos aumenta vantajen iha minutu haat no minutu 12,  no golu ida seluk marka husi Ruben Faria iha minutu lima, hodi Estrela Baguia taka primeira parte ho vantagem 4-1.

Golu resposta husi AS Jerman marka husi jogadór Sebastião Sarmento iha minutu 13, maibé la konsege hapara presaun Estrela Baguia to’o remata jogu parte dahuluk nian.

Tama ba segunda parte, AD Estrela Baguia aumenta tan intensidade jogu no kontinua domina bola. Ekipa ne’e konsege hatama  golu 10 tan, enkuantu AS Jerman la konsege aumenta nia golu.

Golu sira ne’ebé produs iha jogu segunda parte nian  hosi ekipa Estrela Baguia kontribui  hosi Fabian Mone iha minutu 25, Bendito Ramos minutu 26, Daud Manimau minutu 27, no Ruben Faria marka golu tolu tuir malu minutu 32, 32 ho minutu 32.

Denilson Migato aumenta tan iha minutu 33, enkuantu Wahyu Subaha marka iha minutu 39. Ruben Faria kompleta nia hat-trick iha parte daruak ho golu ida tan iha minutu 39.

Husi rezultadu 14-1, ne’e lori ekipa AD Estrela Baguia lidera provizoriu tabela klasifikasaun Liga Futsal Timor-Leste époka 2026 ho pontu neen husi jogu rua manan hotu.

Enkuantu ekipa AS Jerman mantein iha zona degradasaun ho pontu zero husi jogu rua ne’ebé hala’o ona ho rezultadu derota hotu

Jornalista: Davilio Valdamir/ Nelson Dias