Prezidente Repúblika Sei Inaugura Jardim Memória Nicolau Lobato iha Soibada

Jardim Memória Nicolau Lobato iha Aldeia Manlala, Postu Administrativu Soibada, Munisípiu Manatuto. Imajen/Reprodusaun

Soibada, 19 Setembru 2026 (RAFA)-Prezidente Repúblika, José Ramos-Horta sei inaugura Jardim Memória Nicolau dos Reis Lobato iha Soibada iha loron 02 fulan-Outuburu, tinan ne’e.

Jardim momória “a última bala é a minha vitória”  ne’e dedikadu ba Saudozu Prezidente Nicolau dos Reis Lobato, ne’ebé hetan ona bensaun husi Bispu Dioseze Baucau, Dom Leandro Maria Alves  iha Sábadu-ne’e.

“Tanba Prezidente Repúblika agora sei viajen, entaun iha loron 02 fulan-Outubru mak Prezidente Repúblika halo inaugurasaun ofisiál ba jardim memória ne’e,” José Lobato, oan mane husi Saudozu Prezidente Nicolau Lobato informa  ba jornalista sira iha Soibada.

Iha fatin hanesan, Asesor Prezidensia Repúblika, Quintiliano Moniz Carvalho hateten, agora tuur ho família atu ko’alia kona-bá preparasaun ba loron 02 fulan-Outubru, Prezidente Repúblika atu mai inaugura jardim memória Saudozu Prezidente Nicolau dos Reis Lobato.

“Prezidente dehan ba ha’u inaugura Jardim Memória Saudozu Prezidente Nicolau dos Reis Lobato ne’e hakarak inaugura ida espesiál. Entaun, primeiru tenke koordena ho família, hahú Segunda-feira ba oin, ami halo ona koordendasaun entre Gabinete Prezidénsia Repúblika hodi atu hato’o ba minsiteriu relevante sira hodi prepara ba iha loron inaugurasaun, 02 fulan-Outubru,” informa Quintiliano Moniz Carvalho.

Asesor ne’e akresenta, orsamentu ba Jardim Saudozu Prezidente Nicolau dos Reis Lobato mai husi Prezidente Repúblika ho mós família. Maibé, orsamentu ajuda ne’e mak Minsiteriu Obras Públika liu husi Institutu Jestaun Ekipamentuhodi  ateru dalan no  ateru fatin ne’e.

Traballadór sira ne’ebé halo Jardim Memória Saudozu Prezidente Nicolau dos Reis Lobato ne’e mai husi Prezidensia Repúblika, iha ne’eba ekipa ida diresaun ida rekruta joven sira atu ba servisu komunitáriu. Maibé, Jardim ne’e nia laran iha estatua, fatin tur, iha Wi-Fi, Prezidente Repúblika mós hanoin sei tau funsionáriu na’in rua iha ne’e hanesan kuidadu.

Administradora Soibada, Terezinha da Costa hateten, preparasaun ba inaugurasaun Jardim Saudozu Prezidente Nicolau Lobato ne’e tanba Soibada iha suku lima, klaru katak Prezidente iha família ne’ebé kna’ar ba Estadu tanba ne’e administradór ho komunidade sira prontu atu apoiu másimu.

“Planu hakarak postu neen ne’ebé iha Manatuto hakarak prezente hotu iha ne’e, tanba Saudozu rasik nia hanesan Manatuto oan. Atu mobiliza komunidade sira ne’e konforme postu ida-idak nian, pertense husi Soibada rasik sei husu orientasaun husi parte edukasaun, instituisaun hirak ne’ebé iha Soibada atu oferese loron ida ne’e importante ba iha Saudozu nian,” Terezinha da Costa informa.

Soibada iha sentidu espesiál, tanba fatin ida-ne’e mak fó kontribuisaun boot ba nia formasaun morál, inteletuál no akadémiku, liu-liu iha tempu Prezidente Repúblika, José Ramos-Horta  hala’o nia estudu iha Misaun koléjiu Soibada.

Jardim Memória ida-ne’e harii hanesan omenajen la’ós de’it ba Saudozu Nicolau Lobato, hanesan erói nasionál, maibé mós ba família Lobato tomak no hotu-hotu ne’ebé sakrifika sira-nia moris ba luta Independénsia Timor-Leste.

Konstrusaun jardim memória ne’e hala’o durante fulan-tolu, ho envolvimentu direta husi ekipa Prezidénsia Repúblika, liuhusi Unidade Servisu Sosiedade Sivíl no Asuntu Sosiál (SSSAS), ho objetivu atu prezerva memória istórika, valoriza fatin orijinál no fó edukasaun istória ba jerasaun foun kona-ba sakrifísiu Saudozu Nicolau Lobato nian ba ukun-rasik-an Timor-Leste.

Saudozu Nicolau Lobato, nu’udar Primeiru-Ministru dahuluk no Prezidente daruak Timor-Leste nian, mate iha kombate hasoru invazaun Indonézia iha tinan 1978.

Nicolau dos Resis Lobato figura istórika nasionál ne’ebé nia naran uza ona iha fatin públiku barak, hanesan aeroportu, palásiu prezidensial, avenida sira, eskola públiku, edifísiu estadu, institusaun Estadu sira, estatua no fatin sira seluk, atu hamoris nafatin sentidu nasionalizmu iha rai-laran no iha nivel internasionál.

Maski naran Saudozu Nicolau Lobato sai símbolu bo’ot ba Repúblika Demokrátika Timor-Leste, iha momentu balu sosiedade haluha fatin simples ne’ebé nia hahú moris ba iha Aldeia Manlala, Postu Administrativu Soibada, Munisípiu Manatuto. Hosi fatin simples ida-ne’e mak Saudozu Nicolau Lobato hahú dalan ba servisu naran-boot hodi hamoris Timor-Leste iha mapa mundiál.

Hodi fó rekoñesimentu ba istória no nia luta ba rai ida ne’e, Prezidente Repúblika José Ramos-Horta no Laureadu Nobel ba Páz hamutuk ho família Lobato, foti inisiativa, atu hahú harii Jardim Memória iha Saudozu Nicolau Lobato  nia moris fatin.

Jardim ida-ne’e finánsia direta husi osan privadu Prezidente Repúblika nian, ho montante orsamentu  14,000.00 USD, ho medida jardim metru 25 x 18.

Jornalista: Cristina Ximenes