Tribunál Liberta Arguidu Na’in-Rua Ne’ebé Baku Membru CSP Tanba iha Entendimentu Rezolve Tuir Família

Tribunál liberta arguidu na'in-rua ne'ebé baku membru CSP tanba iha entendimentu atu rezolve tuir dalan família.

Díli, 19 Setembru 2026 (RAFA)- Tribunál Judisiál Primeira Instánsia Díli (TJPID), Sabádu-ne’e, deside liberta arguidu na’in-rua ne’ebé Ministériu Públiku akuza ba krime ofensa integridade fízika simples, ne’ebé  suspeita ba kazu baku membru Korpu Seguransa Pesoál (CSP, sigla portugés).

Membru CSP ne’ebé mós hanesan eskóltu ba  Vise-Ministru Asuntu Fortalesimentu Institusionál, Paulo Remédios, hetan agresaun fiziku iha área Colmera, Díli, iha Kuarta 16 Setembru 2026.

Kazu ne’e rezolve liu husi julgamentu sumáriu, depois parte rua;  suspeitu no vítima konkorda atu rezolve problema ne’e liu husi dalan família.

Ministériu Públiku liu-husi Prokuradóra Benvinda da Costa do Rosário halo promosaun ba arguidu na’in-rua hodi lori ba Tribunál ho prosesu primeiru interrogatóriu. Maibé, família arguidu sira ko’alia ho vítima ne’ebé mak membru CSP ne’e atu buka dalan rezolusaun liu-husi entendimentu família.

Iha audénsia sumariu ne’e Prokuradóra Benvinda da Costa do Rosário pkondena arguidu sira ho krime ofensa ba integridade fízika simples ne’ebé  previstu iha artigu 145 Kódigu Penál Timor-Leste

Iha audiénsia julgamentu, Tribunál  liu husi Juíza Ana Paula Fonseca halo uluk identifikasaun ba arguidu na’in-rua. Arguidu sira husu deskulpa no perdaun ba sala ne’ebé sira komete, no vítima, mós konkorda atu perdua arguidu sira.

Arguidu sira  mós deklara bá Tribunál katak  durante  oras 72  ka loron  tolu iha sala detensaun mak   sente arepende ho sira nia hahalok, tanba asaun ne’ebé  sira halo hasoru membru  Polísia ne’e sala, tanba ne’e sira hisu Tribunál atu perdua sira nia sala.

Ho konsiderasaun ba entendimentu entre parte rua, Tribunál deside liberta arguidu na’in-rua husi aktu ne’ebé sira komete.

Julgamentu sumáriu ne’e prezide husi Juíza Ana Paula Fonseca, Ministériu Públiku reprezenta husi Prokuradora Benvinda do Rosario, enkuantu arguidu na’in-rua hetan asisténsia legál husi Defensór Públiku Marçal Mascarinhas.

Jornalista: Marcelino Tomae