Kadete PNTL Na’in-50 Ne’ebé La Admitidu Halo Reklamasaun

Kadete PNTL na’in-50 iha Munisípiu Díli ne'ebé la-admitidu halo reklamasaun ba komisaun rekrutamentu, Sesta 18 Setembru 2026.

Díli, 18 Setembru 2026 (RAFA)- Kadete Polísia Nasionál Timor-Leste (PNTL)  na’in-50  iha Munisípiu Díli ne’ebé la admitidu halo reklamasaun ba komisaun rekrutamentu no barak mak lamenta ho sira nia dokumentu orijinal ne´ebé lakon iha komisaun nia liman bainhira sira halo submeter dokumentu iha faze dahuluk nian.

Genevia Gusmão Pinto hanesan kandidatu ne´ebé la admitidu husi Munisípiu Díli, lamenta no kestiona maka’as tanba  nia diploma orijinál lisensiatura (S1) ne’ebé hatama iha prosesu rekrutamentu antes ne’e lakon iha komisaun rekrutamentu PNTL nia liman bainhira nia halo reklamasaun.

“Ha’u teste iha Díli,  ami hotu-hotu nia problema ne’e mak diploma de’it ne’e mak ami la simu, tanba saida mak balun naton problema iha dokumentu seluk agora mai hotu-hotu iha diploma. Depois ami-nia diploma ne’e ami hatama ida orijinál ne’e agora ami husu fila-fali mai ami nia diploma lakon, ida-ne’e mak ami la simu,” Genevia Gusmão Pinto haktuir ba jornalista sira  iha Sentru Formasaun Polísia (CFP), Comoro, Sesta-ne’e.

Reklamante ne’e esplika, iha prosesu rekrutamentu ajente PNTL antes ne’e nia admitidu, maibé tanba mosu irregularidade no familiarizmu Governu deside anula hodi halo re-verifikasaun no re-teste. Maibé rezultadu foun nia naran sai la admitidu fali.

“Antes ne’e ha’u liu, ha’u admitidu, agora mai fali ha’u la admitidu, ida-ne’e razaun saida. Depois ida uluk ne’e anula totál tanba bazeia ba sistema família, agora ne’e sira dehan fali dokumentu sira uluk ne’e, sira lahatene fali, entaun momentu ami hatama ami nia dokumentu orijinál ne’e bá hotu ne’ebé, sira soe hotu ka sira mak les , sira mak subar k sira mak hakarak sira nia ema mak bá,”  nia lamenta.

Genevia subliña  kuandu Iha prosesu re-teste ne’e nia la admitidu ho razaun dokumentu la kompletu ka diploma orijinál laiha, nune’e nia sente preokupa tebes.

Iha fatin hanesan, Arsénio Bere-Malik, kandidatu kadete foun husi Munisípiu Manufahi ne’ebé la admitidu, lamenta tanba tuir nia haré lista reverifikasaun ne’e nafatin hanesan ho lista anterior ne’ebé sai iha prosesu rekrutamentu 2025.

“Ami mai hato’o ami nia preokupasaun tanba la satisfás ho lista ne’ebé Komisaun Rekrutamentu fó sai. Iha momentu seleksaun dokumentu, ami pasa, maibé ha’u hetan failansu tanba dokumentus diploma la legalizadu. Bainhira komisaun fó oportunidade atu kompleta dokumentu, ha’u rasik lori diploma orijinal atu kompleta, Depois  hau kompleta dokumentus diploma orijinal, hau kontinua ba teste eskrita, maibé bainhira lista foun sai, naran ha’u nian mosu nafatin iha lista la-admitidu, hanesan ho lista uluk. Ida-ne’e halo konfuzaun boot ba ami, kadete foun sira ne’ebé la pasa iha re-teste,” hatete Arsénio Bere Malik.

Arsénio hatutan katak sira la’ós kontra prosesu re-verifikasaun, maibé hakarak hetan rezultadu ne’ebé klaru, transparente no bele fiar, liuliu kona-bá razaun ne’ebé halo sira la-admitidu.

Hatan ba kestaun sira ne´e, Prezidente Komisaun Júri Rekrutamentu Membru Foun PNTL 2026, Komisáriu Asistente José Soares, konfirma ba RAFA liuhusi WhatsApp katak komisaun fó oportunidade ba kandidatu ne’ebé la-admitidu atu hato’o reklamasaun liuhusi Sekretariadu.

“Dokumentu ne’ebé komisaun anterior publika, ita halo re-verifikasaun. Ita la hamosu buat foun ruma tanba ita uza sistema. Kandidatu sira bele hato’o reklamasaun iha Sekretariadu de’it, no júri ho Sekretariadu sei halo press release iha tempu balun,” hatete Komisáriu Asistente José Soares.

Observasaun RAFA Sesta-ne´e, hale’u tuku 10:00  Otl, iha Sentru Formasaun Polísia Comoro, kadete PNTL ne’ebé la-admitidu husi munisípiu hotu-hotu kuaze na’in-50 resin ba halo reklamasaun iha sekretariadu komisaun rekrutamentu ba ajente PNTL nian.

Kadete sira ne’ebé la-admitidu ne’e barak tama ba sala sekretariadu komisaun rekrutamentu hodi halo reklamasaun, maibé kuaze problema maioria dokumentu la kompletu. Maibé husi kadete sira lamenta tanba antes ne’e sira kompleta hotu ona mak teste admitidu maibé naran re-teste nian taka sai la admitidu.

Jornalista: Juvinal Cabral /João Carlos