Xefe Suku Comoro Alerta Komunidade Labele Halo Uma iha Foho Lolon

komunidade komesa harii uma iha foho lolon área Suku Comoro nian.

Díli, 18 Setembru 2026 (RAFA)- Xefe Suku Comoro, Eligio José Marça,  halo alerta ba komunidade atu labele halo uma iha foho lolon tanba risku ba dezastre no área sira foho lolon ne´e konsidera mós hanesan área protejidu.

Xefe Suku Comoro, Eligio José Marçal, ba RAFA iha nia kna’ar fatin, Sesta-ne’e, hatete komunidade barak ne´ebé sira nia hela fatin  hetan eviksaun no despezu administrativu husi Governu, liu-liu iha área sira sentru sidade Díli nian balun kee foho lolon atu halo uma, maibé autoridade laiha koñesimentu.

Nia afirma bainhira autoridade suku hatene sei halo intervensaun tuir lei ne´ebé vigora tanba Governu bandu ona komunidade sira halo uma iha foho lolon.

“Estadu mós bandu  halo uma iha rai lolon. Depois área Suku Comoro ne’e portaun boot ba bainaka sira husi li’ur. Aeroportu Prezidente Nicolau Lobato iha Comoro, maske Suku Madohi maibé koñesidu liu ho Aeroportu Comoro,” Xefe Suku Eligio José Marçal hateten.

Xefe Suku Comoro ne´e afirma, bainhira bainaka sira husi liur mai vizita Timor-Leste, tun hateke ba foho no nia visual sente ladun kapás, bainhira komunidade sa’e foho ke’e rai ne’ebé iha foho leten halo uma.

“Imi bele ba rai hun karik iha fatin ne’ebé imi halo ligasaun ho família balun ne’ebé oferese fatin prontu imi halo to’ok oinsá mak imi bele hetan atu fó nétik osan ba família balun ne’ebé oferese fatin. Maibé rai lolon autoridade suku laiha autorizasaun,” Nia  hateten.

Jornalista: Cristina Ximenes