Suku Comoro Sei Implementa Tara Bandu Hodi Regulariza Komunidade Kumpre Ordem Públiku

Suku Comoro sei aplika tara bandu iha tempu badak hodi kontribui ba moris hakmatek no paz iha suku laran.

Díli, 18 Setembru 2026 (RAFA)- Xefe Suku Comoro, Eligio José Marçal, hatete Suku Comoro sei implementa tara bandu hodi regulariza komunidade sira kumpre ordem públiku iha bairru sira no garante ema hotu moris ho hakmatek, paz no unidade.

Xefe Suku Comoro, Eligio José Marçal ba RAFA, Sesta-ne’e, iha Sede Suku Comoro, hateten programa tara bandu ne’e la’ós Suku Comoro mak hanoin mesak, ne’e apoiu husi Uniaun Europeia depois mai hamutuk ho populasaun Biamalae ho ONG Akfoku atu halo formasaun ba Konsellu Suku ho komunidade sira durante fulan-tolu hodi preparasaun kria esbosu ida ne’ebé Suku Comoro iha ho kapitulu 14 ho artigu 45.

“Programa tara bandu ne’e mai ligasaun ho governu liuhosi Ministériu Agro no Floresta tanba konsidera Comoro mak sai portaun boot ba ema ne’ebé mai husi li’ur vizita, entaun hakarak implementa tara bandu atu garante ambiente di´ak no mós iha sosiedade,” hatete Xefe Suku Comoro, Eligio José Marçal.

Xefe Suku Comoro hatutan, tara bandu ne’e garante tenke labele akontese, tanba tara bandu ne’e halo barullu ne’e bandu ona. Sekarik joven ida, rua baku malu família buka atu rezolve bolu malu hanesan maun alin mak rezolve.

Maibé, se mak keixa ona iha autoridade hanesan xefe aldeia ne’e la tuir bandu ona, tenke kumpri nahe biti, mai tan suku tenke nahe biti la’o tuir ida ne’e saida mak halo. Sekarik kaer osan tenke kaer osan, kaer bibi tenke kaer bibi ne’e sei halo ida ne’e mak regulamentu sei halo. No tanba ne’e konsidera regulamentu ida ne’e nia di’ak mak ne’e atu bele ajuda seguransa sira bainhira, ema hotu-hotu bele hakmatek no livre.

“Ba inan-aman sira tanba kontrola ona sira ne’ebé halo barullu iha kalan, labele tuur to’o kalan boot, labele provoka malu, depois liu-liu ba autoridade sira bele kontrola, tara bandu di’ak mak ne’e, ba ema hotu-hotu,” tenik Xefe Suku.

Autoridade lokál ne´e haktuir, la’ós de’it ba Suku Comoro, suku viziñu sira bele mós suku sira seluk haré karik di’ak prontu implementa tan ba suku sira seluk no iha implementasaun tara bandu ne´e, sei iha mós partisipasaun husi Ministru Agrikultura Floresta Peskas no Pekuariu (MAFPP), Ministru Justisa karik mós konvida órgaun haat ne’e hotu, Prezidente Repúblika, Parlamentu Nasionál, Governu no Tribunál. Konvida mós suku sira viziñu liu-liu komunidade Suku Comoro.

Jornalista: Cristina Ximenes