OXFAM Fasilita Formasaun Ba Jornalista Na’in-31 Kona-Bá “Direitu Ba Rai no Feto Nia Direitu Asesu Ba Rai”

OXFAM Timor-Leste fasilita formasaun ba jornalista hamutuk na’in-31 husi media oin-oin kona-bá “Direitu ba Rai no Feto Nia Direitu Asesu ba Rai”. Kinta-Sesta, 17-18 Setembru 2026.

Díli, 17 Setembru 2026 (RAFA)- Organizaun Internasionál OXFAM iha Timor-Leste fasilita formasaun ba jornalista hamutuk na’in-31 husi media oin-oin kona-bá “Direitu  ba Rai  no Feto Nia Direitu  Asesu ba Rai”.

Formasaun ne’e hala’o durante  loron rua, hahú hosi  Kinta-Sesta, 17-18 Setembru-ne’e, iha Tower Fahuhada, Díli. Programa Manager OXFAM nian, Micael Martins hatete, objetivu husi formasaun ka  treinamentu  ida-ne’e mak oinsá ajuda no kapasita jornalista sira uza termu legál no aprende kona-bá lei sira liu-liu bainhira jornalista sira hakerek notisia kona-bá rai  no feto nia direitu asesu ba rai.

Reprezentante OXFAM ne’e haktuir jornalista sira ne’ebé mak tuir treinamentu ne’e sei iha oportunidade hodi tuir kompetisaun husi OXFAM  kona-bá Award 2026 hakerek notisia di’ak liu koma-bá Direitu Ba Rai no Feto Nia Direitu no  Asesu Ba Rai” ne’ebé sei realiza iha fulan Novembru 2026.

“Atividade ne’e halo ona  iha faze dahuluk iha fulan-Maiu liubá, no ohin ita hahú fali ho faze  segundu, ho objetivu mak hanesan iha fulan-Maiu, ita aprende kona-bá direitu ba rai no feto nian direitu no asesu ba rai, tanba ne’e iha faze segundu ne’e ita aprende kle’an liu kona-bá termu  juridikú sira, liu-liu ba kolega jornalista sira bainhira halo notísia investigasaun ruma, minimu ita iha koñesimentu  legál ruma liga ba asuntu  rai ida-ne’e mak objetivu prinsipál husi ita nian formasaun durante loron rua,” Programa Manager OXFAM Micael Martins esplika.

Iha fatin hanesan formadór, Tito Maia dos Reis ne’ebé nu’udár Advogadu Privadu iha treinamentu ne’e hatete, treinamentu ida-ne’e nu’udár  inisiativa di’ak ba jornalista sira hodi hasa’e sira nia kapasidade oinsá uza termu juridikú sira iha hakerek notisia liuliu kona-bá problema rai no direitu sidadaun feto mane nia asesu ba rai.

“Jornalista nu’udár ponte no profisaun jornalismu ne’e importante no hanesan ponte ne’ebé transmite informasaun sira, ne’ebé jornalista sira mós presiza hatene termolojia juridiká,  lei sira ne’ebé mak apliká Tito Maia dos Reis haktuir.

Nia afirma Timor-Leste agora iha problema komplexu kona-bá rai entre sidadaun baibain ho Governu no problema rai entre família no família, tanba ne’e, treinamentu ida-ne’e importante ba jornalista sira hodi bele aplika iha sira nia servisu jornalismu nian.

Jornalista: Zita Menezes