KSMJ Delibera Pontu Toleransia Pontu Ba Juíz Sira Ne’ebé Konkore Vaga STJ no TR

Delibera pontu toleransia durante loron ualu (8) bá juíz sira ne’ebé konkore ba iha konsursu Juíz Supremu Tribunál Jusitisa (STJ) no Tribunál Rekursu (TR).

Díli, 17 Setembru 2027 (RAFA)- Kosellu Superiór Majistratura Judisiál (CSMJ-sigla portugés) delibera pontu toleransia bá juíz sira ne’ebé konkore ba iha konsursu  ka vaga Juíz  Supremu Tribunál Jusitisa  (STJ) no Tribunál Rekursu (TR).

Juíz Adminitradór TJPID, Yudi Pamukas hatete bá jornalista sira, Kinta-ne’e iha Díli katak, iha Tribunál Judisiál Primeira Instánsia Díli nian Juíz hamutuk na’in-15, no na’in-13 mak konkore iha konkursu ne’e, no na’in rua seluk la tuir tanba ida seidauk priense rekizitu, no ida seluk ho insiativa rasik lakohi konkore iha vaga refere.

Nia hatutan, bazeia bá deliberasaun Konsellu Superior Majistratura Judisiál ne’ebé  foti iha semana kotuk,  konsellu deside no tetu fó  pontu toleransia bá juíz sira ne’ebé mak atu tuir teste  bazeia  komisaun rekrutamentu nian.

“Sei hala’o iha loron 18, 21, 25, no mós iha  iha loron 28 fulan-Setembru-ne’e, entaun deliberasaun konsellu nian fó sira atu  sira iha toleransia de pontu bá iha loron rua antes sira hasoru teste sira ne’e,” hatete Juíz Adminitradór Yudi Pamukas.

Maibé, nia esplika, deliberasaun  pontu toleránsia ne’e la’ós  obrigatóriu katak  juíz sira tenke feriadu, maibé  bá juíz sira ne’ebé maka laiha nesesidade urjénte iha Tribunál ida-ne’e sira bele prepara-aan, estuda, hodi bele iha  loron ne’ebé maka komisaun termina atu  halo teste bá sira  sira prepara atu bá tuir teste.

Juíz ne´e afirma, tanba juíz sira iha direitu atu konkore iha sira nia  kareira rasik, tanba ne’e juíz ne’ebé maka konkore iha konkursu ne’e, tenke prepara aan didi’ak  molok  atu tuir teste refere.

“Durante loron hirak ne’e nia laran, juíz sira bele livre husi servisu,  hanensa toleranisa pontu bá sira, konsellu fó tempu bá  sira para atu foku bá  iha konkursu ida-ne’e,” nia dehan.

Tuir delibersaun  Konsellu  Superior  Majislatura Judisiál ne’ebé RAFA asesa katak fó toleránsia pontu durante loron tomak ba Juíz sira ne’ebé sei partisipa iha teste konkursu ba priénse vaga iha kategoria Juíz Konselleiru Tribunál Supremu Justisa (STJ) no Juíz Tribunál Rekursu (TR).

Desizaun ne’e foti bazeia ba kompeténsia CSMJ no konsidera bá  ezame konkursu ba priense vaga Juíz iha STJ no TR, tuir Deliberasaun CSMJ, iha pontu  lima hosi ordem “diversus”, ne’ebé foti iha loron 09 fulan  Setembru   foin lalais ne’e.

Medida ne’e nia objetivu atu fó oportunidade ba Majistradu Judisiál sira ne’ebé kumpri ona kondisaun atu prepara an no partisipa iha teste sira, konsidera prosesu konkursu ne’e nia importánsia no nivel ezijénsia.

Tuir desizaun ne’e, Juíz sira ne’ebé partisipa iha konkursu sei hetan dispensa hosi ezekusaun sira-nia funsaun jurisdisionál durante loron rua (2) molok realiza ezame no iha loron teste sira.

Maske nune’e, dispensa ne’e la prejudika medida sira ne’ebé presiza foti hodi garante kontinuidade no funsionamentu regulár tribunál sira. Toleránsia pontu ne’e  hahú aplika iha loron 16, 17, 18, 21, 23, 24, 25 no 28 Setembru 2026, tuir Deliberasaun CSMJ.

Delibersauun  ne’e husu , Juíz Administradór sira hosi Tribunál Judisiál Primeira Instánsia sira hanesan Díli, Baukau, Suai no Oé-cuuse tenke foti providénsia nesesáriu hodi organiza servisu sira durante períodu ne’ebé delibera ona.

Medida ne’e fó tempu ba Juíz sira atu konsentra iha preparasaun no partisipa iha prosesu seleksaun bá asesu iha kategória Juíz Konselleiru STJ no Juíz Tribunál Rekursu.

Jornalista: Marcelino Tomae